திருவள்ளூா் மாவட்டக் காவல் நிலையங்களில் பல்வேறு சிறு வழக்குகளில் தொடா்புடைய 89 பேரை குற்றப் பட்டியலில் இருந்து விடுவித்தும், அவா்களின் வாழ்வாதாரத்தை மேம்படுத்திக் கொள்ளும் வகையிலும் வங்கி கடனுதவி பெற்றுத் தர ஏற்பாடு செய்துள்ளதாக காவல் துறை அதிகாரிகள் தெரிவித்தனா்.

திருவள்ளூா் மாவட்டத்தில் திருட்டு, ஜேப்படி, கள்ளச்சாராயம் காய்ச்சுதல், பொதுமக்களைத் தூண்டும் வகையில் போராட்டம் நடத்துதல், அடிதடி வழக்குகள் உள்ளிட்ட பல்வேறு வழக்குகள் காவல் நிலையங்களில் உள்ளன. இதுபோன்ற குற்றப் பின்னணி தொடா்புடையோா் கடந்த சில ஆண்டுகளாக கண்காணிக்கப்பட்டு வந்தனா். அதில், சிலா் கடந்த 4 ஆண்டுகளாக எவ்வித குற்றச் செயல்களிலும் ஈடுபடாமல் அமைதியாக இருந்தனா்.

இவ்வாறு திருந்தி வாழ நினைப்போரை ஒருங்கிணைத்து, அவா்களை குற்றப் பட்டியலில் இருந்து விடுவிக்கும் வகையில், சிறப்பு முகாம் நடத்த மாவட்டக் காவல் கண்காணிப்பாளா் பி.அரவிந்தனுக்கு, காஞ்சிபுரம் சரக டி.ஐ.ஜி. சாமுண்டீஸ்வரி உத்தரவிட்டிருந்தாா். அதன்படி, திருவள்ளூா் மாவட்டக் காவல் துறை சாா்பில் தனியாா் அரங்கத்தில் குற்றப் பின்னணியில் தொடா்புடையோரை பட்டியலில் இருந்து விடுவிக்கும் முகாம் செவ்வாய்க்கிழமை நடைபெற்றது. திருவள்ளூா் கூடுதல் காவல் கண்காணிப்பாளா்கள் முத்துக்குமாா், மீனாட்சி ஆகியோா் தலைமை வகித்தனா். காவல் துணைக் கண்காணிப்பாளா்கள் கல்பனா தத் சாரதி, சேகா், துரைப்பாண்டியன் ஆகியோா் முன்னிலை வகித்தனா்.

முகாமில், திருவள்ளூா் மாவட்டத்தில் உள்ள அனைத்துக் காவல் நிலைய குற்றவாளி பட்டியலில் இருந்து கண்காணிக்கப்பட்டோா் 89 பேரை வரவழைத்து, நல்லொழுக்கத்துடன் வாழ்வதற்குரிய அறிவுரைகளை வழங்கினா். பின்னா் அதிகாரிகள் கூறியது:

காவல் துறையினரின் குற்றப் பட்டியலில் இடம் பெற்றுள்ளவா்கள் தற்போது குற்றப் பட்டியலில் இருந்து உங்களது நன்னடத்தை காரணமாக விடுவிக்கப்படுகின்றனா். தற்போது பட்டியலில் இருந்து விடுபட்டாலும், உங்களை காவல் துறையினா் தொடா்ந்து கண்காணிப்பா். நீங்கள் ஏதேனும் குற்றச் செயல்களில் ஈடுபட்டால், உங்கள் மீது கடுமையான நடவடிக்கை எடுக்கப்படும்.

குற்றப்பட்டியலில் இருந்து விடுவிக்கப்படுவோா் தங்கள் வாழ்வாதாரத்தை மேம்படுத்துவதற்கு தொழில் தொடங்க ஏற்பாடு செய்யுமாறு கோரிக்கை விடுத்தனா். இதை ஏற்று, நீங்கள் தொழில் தொடங்க ஆலோசனைகள் அல்லது உதவிகள் தேவைப்பட்டால், மாவட்டக் காவல் துறை சாா்பில் ஏற்பாடு செய்யப்படும். இதுபோன்ற வாய்ப்புகளை பயன்படுத்திக் கொண்டு காவல் துறையினருக்கு ஒத்துழைப்பு அளித்து அமைதியான முறையில் மகிழ்ச்சியான வாழ்க்கையை வாழ வேண்டும் என அதிகாரிகள் தெரிவித்தனா்.

இதையடுத்து, குற்றப் பின்னணியில் இருந்து விடுவிக்கப்பட்ட 89 பேரும் இனிமேல் எக்காரணம் கொண்டும் குற்றச் செயல்களில் ஈடுபட மாட்டோம் என காவல் துறை அதிகாரிகள் முன்னிலையில் உறுதிமொழி ஏற்றனா்.