ஊத்துக்கோட்டை: ஊத்துக்கோட்டையில் வெள்ளத்தால் அடித்துச் செல்லப்பட்ட ஆரணி ஆற்று தரைப்பாலத்தை திருவள்ளூா் எம்.பி. ஜெயகுமாா் பாா்வையிட்டாா். அங்கு கட்டப்பட்டு வரும் மேம்பாலத்தை அவா் ஆய்வு செய்தாா்.

நிவா் புயல் காரணமாக ஆந்திரத்தில் பெய்த கன மழையால் பிச்சாட்டூா் அணையில் இருந்து திறந்து விடப்பட்ட உபரிநீா் காரணமாக ஆரணியாற்றில் வெள்ளப் பெருக்கு ஏற்பட்டது. இதனால் ஊத்துக்கோட்டையில் இருந்து திருவள்ளூா் செல்லும் சாலையில் ஆரணியாற்றின் குறுக்கே அமைக்கப்பட்ட தரைப்பாலம் அடித்துச் செல்லப்பட்டது.

இதன் காரணமாக, ஊத்துக்கோட்டையில் இருந்து 25 கி.மீ. தொலைவில் உள்ள திருவள்ளூருக்கு 45 கி.மீ சுற்றிக்கொண்டு செல்லும் நிலை ஏற்பட்டுள்ளது. மேலும் ஊத்துக்கோட்டையின் அருகில் உள்ள போந்தவாக்கம், பேரிடிவாக்கம், கச்சூா், சீத்தசேரி உள்ளிட்ட 50-க்கும் மேற்பட்ட கிராம மக்கள் 40 கி.மீ. சுற்றிச் செல்ல முடியாததால் கட்டுமானப் பணிகள் முடிவடையாத மேம்பாலத்தின் மீது ஆபத்தான முறையில் ஏறி இறங்கிச் சென்று வருகின்றனா்.

பொதுமக்கள் மேம்ாபலத்தில் எளிதாக சென்று வரும் வகையில் தற்காலிக இரும்புப் படிகளை காவல் துறை உதவியுடன் நெடுஞ்சாலை துறையினா் அமைத்துள்ளனா். தற்போது பொதுமக்கள் தற்காலிகப் படிகள் வழியாக மேம்பாலத்தில் ஏறி ஆற்றைக் கடந்து செல்கின்றனா்.

இந்நிலையில், திருவள்ளூா் மக்களவை உறுப்பினா் ஜெயகுமாா், மேம்பாலப் பணிகளை புதன்கிழமை பாா்வையிட்டாா். மந்த கதியில் உள்ள பாலப் பணிகளை விரைவாக செய்து முடிக்குமாறு நெடுஞ்சாலைத் துறை அதிகாரிகளுக்கு அறிவுறுத்தினாா். அப்போது, வரும் மாா்ச் மாதத்திற்குள் பணிகள் முடிவுற்று பாலம் தயாராகி விடும் என்று அதிகாரிகள் தெரிவித்தனா்.