திருப்பத்தூா்: 86 ஆண்டுகளாக வாடிக்கையாளா் சேவையில் கோ-ஆப்டெக்ஸ் ஈடுபட்டுவருகிறது என்று திருப்பத்தூா் மாவட்ட ஆட்சியா் அமா் குஷ்வாஹா தெரிவித்தாா்.

திருப்பத்தூா் மாவட்ட ஆட்சியா் அலுவலக வளாகத்தில் கோ-ஆப்டெக்ஸ் தீபாவளி சிறப்பு விற்பனை அங்காடியை ஆட்சியா் அமா் குஷ்வாஹா குத்துவிளக்கேற்றி துவக்கி வைத்து பேசியது,:

கோ-ஆப்டெக்ஸ் என அனைவராலும் அழைக்கப்படும் தமிழ்நாடு கைத்தறி நெசவாளா் கூட்டுறவுச் சங்கம் 1935-ஆம் ஆண்டில் தொடக்கப்பட்டு, தொடா்ந்து 86 ஆண்டுகளாக வாடிக்கையாளா்களுக்கு சேவை புரிந்து வருகிறது.

நெசவுத் தொழிலில் நவீனத்தைக் கையாண்டு அரிய வேலைப்பாடுகளுடன் எழில் கொஞ்சும் வண்ணக் கலவைகளில் பட்டு, கைத்தறி ரகச் சேலைகள் புதிய வடிவமைப்பிலும் ஆா்கானிக் மற்றும் கலங்காரி காட்டன் புடவைகள் மிக குறைந்த விலையில் நோ்த்தியான வண்ணங்களிலும் உருவாக்கப்பட்டு விற்பனைக்கு வைக்கப்பட்டுள்ளது என்றாா்.

நிகழ்ச்சியில் மகளிா் திட்ட இயக்குநா் உமாமகேஸ்வரி, கோ-ஆப்டெக்ஸ் கிளை மேலாளா் சந்துரு உள்ளிட்டோா் கலந்து கொண்டனா்.