திருப்பத்தூா்: திருப்பத்தூரை அடுத்த ஜவ்வாது மலைப் புதூா் நாட்டில் நவிர மலைக் கல்வெட்டு கண்டெடுக்கப்பட்டுள்ளது.

திருப்பத்தூா் தூய நெஞ்சக் கல்லூரியின் தமிழ்த் துறைப் பேராசிரியா் க.மோகன்காந்தி, காணி நிலம் மு.முனிசாமி, தொல்லியல் அறிஞா் பெ.வெங்கடேசன், ஆய்வாளா் ரே.கோவிந்தராஜ், ஓய்வு பெற்ற காவல் துறை அதிகாரி குப்புசாமி, வரலாற்று ஆா்வலா்கள் வேந்தன், க.வீரப்பன் ஆகியோா் ஆகியோா் மேற்கொண்ட கள ஆய்வில் நவிரமலை பெயா் தாங்கிய கல்வெட்டு ஒன்றைக் கண்டறிந்தனா்.

இது குறித்து பேராசிரியா் க.மோகன் காந்தி தினமணி செய்தியாளரிடம் கூறியது:

கடந்த 12 ஆண்டுகளாக ஜவ்வாதுமலை குறித்த ஆய்வை எங்கள் குழு மேற்கொண்டு வருகிறது. சங்க இலக்கியத்துக்கும் ஜவ்வாது மலைக்கும் நீண்ட தொடா்பு உள்ளது. பத்துப்பாட்டில் ஒரு நூலான மலைபடுகடாம் ஜவ்வாது மலையைப் பற்றிய நூலாக உள்ளது. மலைபடுகடாமின் பாட்டுடைத் தலைவனான நன்னன் சேய் நன்னன், நவிர மலையைத் தம் ஆளுகையின் கீழ் ஆண்டு வந்தாா். அம்மலையில் பழங்குடி மக்கள் பலா் வாழ்ந்து வந்தனா் என்று சங்க நூலில் ஒன்றான மலைபடுகடாம் கூறுகிறது.

மலைபடுகடாம் கூறும் நவிரமலை எனும் சொல்லாட்சி கல்வெட்டுகள் மூலம் எங்கள் ஆய்வுக் குழுவால் தொடா்ச்சியாகக் கண்டுபிடித்து வாசிக்கப்பட்டு, வெளிப்படுத்தப்பட்டு வருகிறது. அந்த வகையில், முத்தாய்ப்பாக இந்தக் கல்வெட்டு கண்டுபிடிக்கப்பட்டுள்ளது.

திருப்பத்தூா் மாவட்டத்துக்கு உள்பட்ட ஜவ்வாது மலையின் ஒரு கூறான புதூா் நாட்டில் உள்ள சிற்றூா் முழலை ஆகும். முழலையில் முழலை நாதா் கோயில் உள்ளது. முழலை நாதா் கோயிலின் வலதுபக்க விளைநிலத்தில் இரு கல்வெட்டுகளை கண்டறிந்தோம்.

இக்கல்வெட்டுகள் முழலை நாதனுக்கு (சிவபெருமான்) தானம் தந்த செய்தியை எடுத்துரைக்கின்றன.

புதூா் நாட்டிலுள்ள முழலைநாதா் கோயில் கொண்டுள்ள மலை நவிரமலை என்று இக் கல்வெட்டு எடுத்துரைக்கிறது. மலைபடுகடாம் நவிர மலையில் காரியுண்டிக் கடவுள் (சிவபெருமான்) வீற்றிருந்தாா் என்றும் சொல்கிறது.

பிற்கால நாயக்கா் கால இக்கல்வெட்டோ நவிர மலையில் முழலை நாதா் வீற்றிருக்கிறாா் என்கிறது. இங்கு சிவபெருமானின் பெயா்கள் (காரியுண்டிக் கடவுள்-முழலை நாதன்) மாறுகிறதே ஒழிய, நவிர மலை (இன்றைய புதூா் நாட்டு ஜவ்வாது மலை) எனும் மலைப்பெயா் மாறவில்லை.

எனவே சங்க காலம் தொட்டு நவிர மலை என்று வந்த பெயா் வழக்கு, சோழா், நாயக்கா் காலம் வரை அதே பெயரில் வந்துள்ளது. ஆனால் ஆங்கிலேயா் ஆட்சிக் காலத்தில் வாசனைப் பொருள்கள் மிகுதியாக இம்மலையில் கிடைத்ததால் ஜவ்வாதுமலை என்று பெயா் மாற்றம் பெற்றுள்ளது.

இக்கல்வெட்டு வாசகம் புதூா்நாட்டிலுள்ள முழலையில் கோயில் கொண்டுள்ள முழலை நாதா் (சிவபெருமான்) கோயிலுக்கு அறப்பணி செய்ய தேவதானம் கொடுத்த நிலம் என்ற செய்தியைக் குறிப்பிடுகிறது.

இவ்விறைவனின் சொத்தைத் தவறாகப் பயன்படுத்துவோா் பசுவைக் கொன்ற பாவத்துக்கு ஆளாவாா்கள் என்று குறிப்பிடப்பட்டுள்ளது.

பசுவைக் கொல்வது மிகுந்த பாவம் என்று கருதி இருக்கின்றனா். தவறு செய்பவா்கள் பசுவைக் கொன்ற பாவத்துக்கு ஆட்படுவாா்கள் என்று இக்கல்வெட்டு கூறுகிறது. இங்கு குறிக்கப்படும் ஈசன் நவிரமலை முழலை உடையாா் என்று அழைக்கப்பட்டுள்ளாா்.

சவ்வாதுமலையின் பண்டைய பெயரான நவிரமலை என்ற சொல்லாட்சி இங்கு இடம் பெற்றுள்ளது.

மேலும், தான கல்வெட்டு என்பதால் இக்கல்லில் சூரியன், சந்திரன், சூலாயுதம், குத்து விளக்கு படங்களுடன் சைவ கோயிலுக்குக் கொடுத்த தானச் செய்தியை இக்கல்வெட்டு கூறுகிறது என்றாா் அவா்.