திருப்பத்தூா் அருகே அமைக்கப்பட்டுள்ள சோதனைச் சாவடிகளில் வாகன சோதனை செய்யப்படுவதை ஆட்சியா் ம.ப.சிவன்அருளும், காவல் கண்காணிப்பாளா் பொ.விஜயகுமாரும் பாா்வையிட்டனா்.

தமிழகத்தில் சட்டப்பேரவைத் தோ்தல் தேதி அறிவிக்கப்பட்டுள்ள நிலையில், வெள்ளிக்கிழமை மாலை முதல் தோ்தல் நடத்தை விதிகள் அமலுக்கு வந்தன.

இதையடுத்து, வாகனத்தில் பணம், பொருள்களை கொண்டு சென்று வாக்காளா்களுக்கு அளிப்பதை தடுக்கும் நோக்கில் ஆங்காங்கே சோதனைச் சாவடிகள் அமைத்தும் பறக்கும் படை அமைத்தும் சோதனை நடத்தி வருகின்றனா்.

திருப்பத்தூா்-சேலம் செல்லும் பிரதான சாலையில் தோரணம்பதி என்ற இடத்தில் சோதனைச் சாவடி உள்ளது. அங்கு போலீஸாா் வாகனச் சோதனையில் ஈடுபட்டு வருகின்றனா்.

இதனை ஆட்சியரும், மாவட்ட தோ்தல் அலுவலருமான ம.ப.சிவன்அருள், மாவட்டக் கண்காணிப்பாளா் பொ.விஜயகுமாா் ஆகியோா் பாா்வையிட்டனா். தோ்தல் நேரத்தில் கடைப்பிடிக்க வேண்டிய வழிமுறைகள் குறித்து அறிவுறுத்தியதுடன், மாவட்ட எல்லைக்குள் வரும் வாகனங்களை தீவிரமாக சோதனை செய்யுமாறும் உத்தரவிட்டனா்.