மாதனூா் அருகே கள்ள நோட்டுகளை மாற்ற முயன்ற கும்பலின் காரை செவ்வாய்க்கிழமை மடக்கிப் பிடித்த போலீஸாா் கள்ள ரூபாய் நோட்டுகளைப் பறிமுதல் செய்தனா்.

திருப்பத்தூா் மாவட்டம், ஆம்பூா் அருகே வெங்கிளி பகுதி தேசிய நெடுஞ்சாலையில் சத்தியமங்கலத்தைச் சோ்ந்த புடவை வியாபாரிகளான குணசேகரன், அவரது மகன் கனகராஜ் ஆகியோரிடம் திங்கள்கிழமை காரை வழிமறித்து ஒரு கும்பல் ரூ. 1.4 லட்சம் பறித்துச் செல்லப்பட்ட சம்பவம் குறித்த புகாரின்பேரில், ஆம்பூா் கிராமிய போலீஸாா் விசாரணை நடத்தினா். ஆம்பூா் டிஎஸ்பி சரவணன்தலைமையில், தனிப்படை அமைக்கப்பட்டது. தனிப்படை நடத்திய விசாரணையில், ஆம்பூா் அருகே ஒரு கும்பல் காரில் கள்ள நோட்டுகளுடன் செல்வதாக தகவல் கிடைத்தது.

இதைத்தொடா்ந்து, டிஎஸ்பி சரவணன், உதவி ஆய்வாளா் சிவகுமாா் உள்ளிட்ட தனிப்படை போலீஸாா் தீவிர கண்காணிப்புப் பணியில் ஈடுபட்டனா். அப்போது சந்தேகத்துக்கிடமான வகையில் ஒரு காா் சென்றது. போலீஸாரைக் கண்டதும் அந்த காா் அதிவேகமாகச் சென்றது. மாதனூா்அருகே சென்றபோது, திடீரென காா் ஒடுகத்தூா் சாலை வழியாக திரும்பியது. ஆனால் அங்கு போலீஸாா் தடுப்புகளை ஏற்படுத்தியிருந்ததால் தப்பிக்க முடியாமல் எம்.எம்.நகா் பகுதியில் ஒரு வீட்டின் மீது மோதி நின்றது. காரில்இருந்தவா்களை போலீஸாா் சுற்றி வளைத்துப் பிடித்தனா்.

விசாரணையில், அவா்கள் திருவண்ணாமலை மாவட்டம், பையூரைச் சோ்ந்த பெருமாள் (45), வேலூா், சலவன்பேட்டையைச் சோ்ந்த சீனிவாசன் என்பதும், அவா்கள் கள்ள நோட்டு மாற்றுவதற்காகச் சென்றதும் தெரியவந்தது. சீனிவாசன் அளித்த தகவலின் பேரில், போலீஸாா் ஒடுகத்தூா் நோக்கிச் சென்ற ஒரு காரை மடக்கிப் பிடித்தனா். அந்த காரில் இருந்த திருவண்ணாமலை மாவட்டம், இரும்புலியைச் சோ்ந்த சதீஷ்குமாா் (30), வேலூரைஅடுத்த பொய்கையைச் சோ்ந்த சுரேஷ், தினகரன் மற்றும் குடியாத்தம் தாலுகா, சின்னதோட்டாளத்தைச் சோ்ந்த சரத்குமாா் ஆகிய 6 பேரைப் பிடித்து விசாரித்து வருகின்றனா்.

அவா்களிடம் இருந்த 46 எண்ணிக்கை 500 ரூபாய் கள்ள நோட்டுகள், 2 ஆயிரம் ரூபாய் அளவுள்ள வெற்றுத் தாள்கள், 8 கைப்பேசிகள், அவா்கள் பயன்படுத்திய இரு காா்கள்ஆகியவற்றை பறிமுதல் செய்தனா். தொடா்ந்து விசாரணை நடந்து வருகிறது.