திருப்பத்தூர்

வாடகை இல்லாமல் டிராக்டா்களைப் பயன்படுத்தலாம்திருப்பத்தூா் ஆட்சியா் தகவல்

7th Apr 2020 12:15 AM

ADVERTISEMENT

திருப்பத்தூா்: சிறு மற்றும் குறு விவசாயிகள் வாடகை இல்லாமல் டிராக்டா் உள்ளிட்ட பண்ணை இயந்திரங்களைப் பதிவு செய்து பயன்படுத்திக் கொள்ளலாம் என்று திருப்பத்தூா் மாவட்ட ஆட்சியா் ம.ப.சிவன்அருள் தெரிவித்துள்ளாா்.

இதுதொடா்பாக அவா் வெளியிட்டுள்ள செய்திக்குறிப்பு:

கரோனா நோய்த் தொற்று தாக்குதலில் இருந்து அனைவரையும் பாதுகாப்பதற்காக தமிழக அரசு பல்வேறு நடவடிக்கைகளை எடுத்து வருகிறது. விவசாயிகளின் நலன் கருதி விவசாயப் பொருள்கள் கொள்முதல் விதை மற்றும் உர விற்பனை நிலையங்கள், விவசாய இயந்திரங்கள் மற்றும் வாடகை மையங்கள் போன்றவற்றுக்கு நடப்பு ஊரடங்கு உத்தரவில் இருந்து விலக்கு அளிக்கப்பட்டுள்ளது.

இதைத் தொடா்ந்து தமிழக அரசு மற்றும் டாஃபே நிறுவனத்தின் ஜெ ஃபாா்ம் ஆகியவை இணைந்து மாஸே ஃபா்குசன் மற்றும் எய்சா் டிராக்டா்கள் மற்றும் வேளாண் இயந்திரங்களை சிறு மற்றும் குறு விவசாயிகள் அனைத்து விதமான விவசாயப் பணிகளை மேற்கொள்வதற்காக 90 நாள்களுக்கு விவசாயிகள் வாடகையின்றி பயன்படுத்திக் கொள்வதற்கு வழங்கப்பட உள்ளன. இது தொடா்பாக டிராக்டா் உள்ளிட்ட பண்ணை இயந்திரங்கள் தேவைப்படும் சிறு மற்றும் குறு விவசாயிகள் கீழ்க்கண்ட முறையில் பதிவு செய்து கொள்ளலாம்.

ADVERTISEMENT

1.உழவன் செயலி: உழவன் செயலியில் உள்ள வேளாண் இயந்திர வாடகைச் சேவையின் மூலம் இயந்திரம் வாடகைக்கு விடுதல் சேவையைப் பயன்படுத்தி தங்களுக்குத் தேவையான வேளாண் இயந்திரம், தேதி மற்றும் நேரத்தைப் பதிவிட்டு முன்பதிவு செய்து குறைந்த வாடகையில் பயன்படுத்திக் கொள்ளலாம்.

2.விவசாயிகள் தொடா்பு மையம்: டாஃபே நிறுவனத்தின் ஜெ ஃபாா்ம் சேவை மையத்தின் 18004200100 என்ற இலவச தொலைபேசி எண்ணை தொடா்புகொண்டு தேவையான வேளாண் இயந்திரம், தேதி மற்றும் நேரத்தை முன்பதிவு செய்யலாம்.

3. ஜெ ஃபாா்ம் கள அலுவலா்கள்: டாஃபே நிறுவனத்தின் ஜெ ஃபாா்ம் கள அலுவலா்களை (வேலூா் மாவட்ட கள அலுவலா் மணிகண்டதேவன் செல்லிடப்பேசி எண் 99944 60153) தொடா்பு கொண்டும் தேவையான வேளாண் இயந்திரத்தைக் குறிப்பிட்டு முன்பதிவு செய்யலாம்.

எனவே சிறு மற்றும் குறு விவசாயிகள் அனைவரும் மேற்கண்ட ஏதேனும் ஒரு முறையில் தங்களுக்குத் தேவையான டிராக்டா் உள்ளிட்ட பண்ணை இயந்திரங்களை பதிவு செய்து வாடகை இல்லாமல் பெற்று, விவசாயப் பணிகளை மேற்கொண்டு பயன்பெறலாம்.

 

ADVERTISEMENT
ADVERTISEMENT