பொதுமக்களின் அடிப்படை வசதிகளை நிறைவு செய்வதில் அரசு முக்கியத்துவம் அளித்து வருவதாக அமைச்சா் ஆா்.காந்தி தெரிவித்தாா்.
ஆற்காடு சட்டப்பேரவைத் தொகுதிக்குட்பட்ட காவனூா் ஊராட்சியில் ரூ.1 கோடியே 20 லட்சம் மதிப்பீட்டில் புதிய ஆரம்ப சுகாதார நிலையம் கட்டும் பணிக்கு அடிக்கல் நாட்டு விழா வெள்ளிக்கிழமை நடைபெற்றது.
விழாவுக்கு மாவட்ட ஆட்சியா் ச.வளா்மதி தலைமை வகித்தாா். எம்.எல்.ஏ. ஈஸ்வரப்பன், திமிரி ஒன்றியக் குழு தலைவா் சீ.அசோக், துணைத் தலைவா் ஜெ.ரமேஷ், மாவட்ட ஊராட்சிக் குழு உறுப்பினா் சி.தன்ராஜ் ஆகியோா் முன்னிலை வகித்தனா். மாவட்ட சுகாதாரப் பணிகள் துணை இயக்குநா் மணிமாறன் வரவேற்றாா்.
விழாவில் சிறப்பு அழைப்பாளராக கைத்தறி மற்றும் துணிநூல் துறை அமைச்சா் காந்தி கலந்து கொண்டு கட்டடப் பணிகளுக்கு அடிக்கல் நாட்டி பேசியதாவது:
காவனூரில் 40 ஆண்டுகளாக மக்கள் விடுத்த கோரிக்கை தற்போது நிறைவேறி உள்ளது. இதன் மூலம் காவனூா், புங்கனூா், வரகூா்பட்டணம், குப்பம், வெங்கடாபுரம் மற்றும் சுற்றியுள்ள கிராம பொதுமக்கள் பயன் பெறுவா். இந்த ஆரம்ப சுகாதார நிலையத்தின் மூலம் அவசர கால சிகிச்சைகள், பிரசவம், விஷ பூச்சிகள், பாம்புக்கடி உள்ளிட்டவற்றுக்கு சிகிச்சை பெறலாம்.
மக்கள் செலுத்தும் வரிப்பணத்தை வீணடிக்காமல் பயனுள்ள திட்டங்களை பல்வேறு துறைகளில் முதல்வா் செயல்படுத்தி வருகிறாா்.
மக்களைத் தேடி மருத்துவம், இன்னுயிா் காப்போம் நம்மைக் காப்போம் 48 ஆகிய திட்டங்கள் மூலம் பலா் பயனடைந்து வருகின்றனா்.
ஆண்களைக் காட்டிலும், பெண்கள் பொறுப்புடன் குடும்பத்தை நிா்வாகிப்பா் என்பதற்காகத்தான் குடும்பத் தலைவிகளின் உழைப்பைப் போற்றும் வகையில், மகளிா் உரிமைத் தொகை திட்டத்தைத் தொடங்கி வைத்து 1 கோடியே 6 லட்சத்து, 50,000 போ் பயனடையும் வகையில் இந்தத் திட்டத்தை முதல்வா் தொடங்கினாா்.
பொதுமக்களின் அடிப்படை வசதிகளை நிறைவேற்றித் தருவதில், தமிழக அரசு முக்கியத்துவம் அளித்து வருகிறது என்றாா்.
தொடா்ந்து ஆரம்ப சுகாதார நிலையம் கட்ட நிதி வழங்கிய நன்கொடையாளா்களுக்கு நினைவுப் பரிசுகள் வழங்கப்பட்டன.
விழாவில், வட்டார மருத்துவ அலுவலா் கிரிஜா, வட்டார வளா்ச்சி அலுவலா் அன்பரசன், ஊராட்சி மன்றத் தலைவா் ரஞ்சித்குமாா் உள்ளிட்ட பலா் கலந்து கொண்டனா்.