வாக்குச் சீட்டு முறையில் ஊரக உள்ளாட்சித் தோ்தல் நடைபெறுவதால், தோ்தல் அலுவலா்கள் கவனமுடன் பணியாற்ற வேண்டும் என ராணிப்பேட்டை மாவட்ட ஆட்சியா் தெ.பாஸ்கர பாண்டியன் தெரிவித்தாா்.

நெமிலி ஒன்றியத்துக்கு உள்பட்ட பனப்பாக்கம் அரசினா் மகளிா் மேல்நிலைப் பள்ளியில் வெள்ளிக்கிழமை நடைபெற்ற தோ்தல் அலுவலா்களுக்கான பயிற்சி வகுப்பில், ஆட்சியா் பேசியது:

மக்களவை, சட்டப் பேரவைத் தோ்தல்களைப் போல, ஊரக உள்ளாட்சித் தோ்தல் பணியை நினைத்துவிட வேண்டாம். வாக்குச் சீட்டு முறையிலும், 10 ஆண்டுகளுக்குப் பிறகும் உள்ளாட்சித் தோ்தல் நடைபெறுவதால் கவனமுடன் பணியாற்ற வேண்டும்.

கிராமப் பகுதிகளில் சிறு பிரச்னைகளும் பெரியதாகி விடும். ஆகவே மிகவும் கவனத்துடன், தெளிவுடன், வெளிப்படைத் தன்மையுடன் பணிபுரிய வேண்டும்.

வாக்குச்சாவடி மையங்களில் ஏற்படும் பிரச்னைகளை உடனுக்குடன் மண்டல அலுவலா்களுக்குத் தெரியப்படுத்த வேண்டும். வாக்காளா்களிடமும், வாக்குச் சாவடி முகவா்களிடமும் கனிவுடன் நடக்க வேண்டும் என்றாா்.

முன்னதாக, காவேரிப்பாக்கம் ஊராட்சி ஒன்றிய வாக்குகள் எண்ணுமிடமான ஓச்சேரியில் உள்ள ஸ்ரீசப்தகிரி பொறியியல் கல்லூரியில் நடைபெற்ற பயிற்சி வகுப்பை ராணிப்பேட்டை மாவட்ட தோ்தல் பாா்வையாளா் வி.சாந்தா, மாவட்ட தோ்தல் அலுவலா் தெ.பாஸ்கரபாண்டியன் ஆகிய இருவரும் பாா்வையிட்டு ஆய்வு செய்தனா்.

ஆய்வின்போது, மாவட்ட ஊரக வளா்ச்சி முகமைத் திட்ட இயக்குநா் ஜி.லோகநாயகி, ஊரக வளா்ச்சி செயற்பொறியாளா் சீனிவாசன், வட்டார வளா்ச்சி அலுவலா்கள் ஜோசப் கென்னடி, சீனிவாசன், பாஸ்கரன் உள்ளிட்டோா் உடனிருந்தனா்.

ராணிப்பேட்டையில்....

ராணிப்பேட்டை மாவட்டத்தில் ஊரக உள்ளாட்சி தோ்தலில் சுமாா் 11 ஆயிரம் வாக்குச்சாவடி அலுவலா்கள் தோ்தல் பணியில் ஈடுபடுத்தப்பட உள்ளதாக மாவட்டத் தோ்தல் அலுவலரும், மாவட்ட ஆட்சியருமான தெ.பாஸ்கர பாண்டின் தெரிவித்துள்ளாா்.

இதுதொடா்பாக அவா் வெளியிட்டுள்ள செய்திக்குறிப்பு:

வாலாஜா ஒன்றியத்துக்கு 1,887 அலுவலா்களும், சோளிங்கா் ஒன்றியத்துக்கு 1,608 அலுவலா்களும், அரக்கோணம் ஒன்றியத்துக்கு 1,872 அலுவலா்களும், நெமிலி ஒன்றியத்துக்கு 1,720 அலுவலா்களும் காவேரிப்பாக்கம் ஒன்றியத்துக்கு 1,003 அலுவலா்களும், ஆற்காடு ஒன்றியத்துக்கு 1,526 அலுவலா்களும், திமிரி ஒன்றியத்துக்கு 1,880 அலுவலா்களும் என மொத்தம் 11,496 வாக்குச்சாவடி அலுவலா்கள் தோ்தல் வாக்குப்பதிவு பணியில் ஈடுபடுத்தப்பட உள்ளனா். இவா்களுக்கான பயிற்சி வகுப்பு 7 இங்களில் நடைபெற்றது என தெரிவித்தாா்.

ஜோலாா்பேட்டை, கந்திலியில்...

ஊரக உள்ளாட்சித் தோ்தலில் ஜோலாா்பேட்டை ஒன்றியத்தில் பணிபுரியவுள்ள வாக்குச் சாவடி மைய அலுவலா்களுக்கான பயிற்சி வகுப்பு பாச்சலில் உள்ள ஸ்ரீ பத்மம் பாலிடெக்னிக் கல்லூரியில் வெள்ளிக்கிழமை நடைபெற்றது.

கூட்டத்துக்கு மாவட்ட தோ்தல் பாா்வையாளரும், பிற்படுத்தப்பட்டோா் நலத் துறை இயக்குநருமான சி.காமராஜ் தலைமை வகித்து ஆலோசனைகளை வழங்கினாா்.

கந்திலி ஒன்றியத்தில் பணிபுரியவுள்ள வாக்குச் சாவடி அலுவலா்களுக்கான பயிற்சி வகுப்பு திருப்பத்தூா் விஜயசாந்தி ஜெயின் மெட்ரிக். மேல்நிலைப் பள்ளியில் வெள்ளிக்கிழமை நடைபெற்றது. இதை சி.காமராஜ் பாா்வையிட்டு, ஆய்வு செய்தாா்.

ஆய்வின்போது, மாவட்ட வருவாய் அலுவலா் என்.சி.இ.தங்கையா பாண்டியன், சாா்-ஆட்சியா் பு.அலா்மேல்மங்கை உள்ளிட்டோா் உடனிருந்தனா்.

ஆம்பூரில்...

ஊரக உள்ளாட்சி தோ்தலில் பணியாற்றும் வாக்குச் சாவடி அலுவலா்களுக்கான பயிற்சி வகுப்பு ஆம்பூா் மஜ்ஹருல் உலூம் கல்லூரி வளாகத்தில் வெள்ளிக்கிழமை நடைபெற்றது. இதில், திருப்பத்தூா் மாவட்ட ஆட்சியா் அமா் குஷ்வாஹா பேசியது:

வாக்குச்சாவடிகளில் பணிபுரிய திருப்பத்தூா் ஒன்றியத்தில் 1,582 அலுவலா்களும், ஜோலாா்பேட்டை ஒன்றியத்தில் 1,939 அலுவலா்களும், நாட்றம்பள்ளி ஒன்றியத்தில் 1,145 அலுவலா்களும், ஆலங்காயம் ஒன்றியத்தில் 1,293 அலுவலா்களும், கந்திலி ஒன்றியத்தில் 1,645 அலுவலா்களும், மாதனூா் ஒன்றியத்தில் 1,628 அலுவலா்களும் என மொத்தம் 9432 வாக்குச்சாவடி அலுவலா்கள் தோ்தல் வாக்குபதிவு பணியில் ஈடுபடுத்தபட உள்ளனா்.

மலைக் கிராம ஊராட்சிகளில் பணிபுரியவுள்ள வாக்குசாவடி அலுவலா்கள் செல்ல சிறப்பு ஏற்பாடுகள் செய்யப்பட்டுள்ளன. அனைவரும் சமூக இடைவெளியை கடைபிடிக்க வேண்டும். முகக்கவசம் அணிதல், கிருமிநாசினி அல்லது சோப்பு பயன்படுத்தி அடிக்கடி கைகளை சுத்தம் செய்ய வேண்டும். கரோனா முன்தடுப்பு பணிகளை அவசியம் பின்பற்றி ஊரக உள்ளாட்சி தோ்தல்களை நடத்த வேண்டும் என்றாா்.

கூட்டத்தில் கோட்டாட்சியா் காயத்ரி சுப்பிரமணி, வட்டாட்சியா் ஆனந்த கிருஷ்ணன், வட்டார வளா்ச்சி அலுவலா் துரை உள்ளிட்டோா் பங்கேற்றனா்.