நெமிலி சாா்-பதிவாளா் அலுவலகத்துக்கு ரூ. 1 கோடி நிதியில் கட்டப்பட்ட புதிய கட்டடத்தை செவ்வாய்க்கிழமை தமிழகமுதல்வா் மு.க.ஸ்டாலின் காணொலி மூலம் திறந்து வைத்தாா். அக்கட்டடத்தில் நடைபெற்ற நிகழ்ச்சியில் மாவட்ட ஆட்சியா் தெ.பாஸ்கரபாண்டியன் குத்துவிளக்கேற்றி பொதுமக்களுக்கு இனிப்புகளை வழங்கினாா்.

ராணிப்பேட்டை மாவட்டம் நெமிலியில் புதிய சாா்-பதிவாளா் அலுவலகத்துக்கு புதிய கட்டடம் கட்ட கடந்த ஜனவரி 2020-இல் ரூ. 1 கோடி நிதி ஒதுக்கப்பட்டு பணிகள் நடைபெற்றன. இக்கட்டடம் தரைத்தளம் மற்றும் முதல்தளம் என 0.13 ஏக்கா் பரப்பளவில் கட்டப்பட்டுள்ளது. 3,932 சதுரஅடி பரப்பில் கட்டப்பட்டுள்ள இக்கட்டடத்தில் சாா்-பதிவாளா் அறை, அலுவலக அறை, கணினிஅறை, வைப்பு அறை, காத்திருப்போா் அறை மற்றும் பதிவு அறையும் அமைக்கப்பட்டுள்ளது. மழைநீா் சேகரிப்பு முறை மற்றும் மாற்றுத்திறனாளிகள் உள்ளே வருவதற்கான வசதிகளுடன் கட்டப்பட்டுள்ள இக்கட்டடத் திறப்பு விழா செவ்வாய்க்கிழமை நடைபெற்றது.

சென்னையில் நடைபெற்ற நிகழ்ச்சியில், தமிழக முதல்வா் மு.க.ஸ்டாலின் காணொலி மூலம் கட்டடத்தை திறந்து வைத்தாா். இதைத் தொடா்ந்து, நெமிலி, சாா்-பதிவாளா் அலுவலக புதிய கட்டடத்தில் ராணிப்பேட்டை மாவட்ட ஆட்சியா் தெ.பாஸ்கரபாண்டியன் குத்துவிளக்கேற்றி பொதுமக்களுக்கு இனிப்புகளை வழங்கினாா்.

நிகழ்ச்சியில், சோளிங்கா் எம்எல்ஏ ஏ.எம்.முனிரத்தினம், பதிவுத் துறை வேலூா் மண்டல துணைத் தலைவா் அருள்சாமி, மாவட்ட ஊராட்சிக் குழுத் தலைவா் ஜெயந்தி திருமூா்த்தி, நெமிலி ஒன்றியக் குழுத் தலைவா் பெ.வடிவேலு, மாவட்டப் பதிவாளா்கள் ஸ்ரீதா், சக்திவேல், நெமிலி சாா்-பதிவாளா் வெங்கடேசன், பொதுப்பணித் துறை செயற்பொறியாளா் சங்கரலிங்கம், மாவட்ட ஊராட்சிக் குழு உறுப்பினா் சுந்தராம்பாள் பெருமாள், நெமிலி வட்டாட்சியா் ரவி, திமுக நெமிலி மேற்கு ஒன்றியச் செயலா் ரவீந்திரன், நெமிலி பேரூராட்சி செயலா் ஜனாா்த்தனன் உள்ளிட்ட பலா் பங்கேற்றனா்.