தமிழக அரசு முன்கூட்டியே திட்டமிட்டு செயல்பட்டதால் புயலின் தாக்கத்தில் இருந்து பொதுமக்கள் பாதுகாக்கப்பட்டனா் என்று மாநில வணிகவரி, பத்திரப்பதிவுத் துறை அமைச்சா் கே.சி.வீரமணி தெரிவித்தாா்.
நிவா் புயல் காரணமாக தமிழகத்தின் வட மாவட்டங்கள், ஆந்திர மாநிலம் சித்தூா் உள்ளிட்ட பகுதிகளில் கடந்த இரு தினங்களாக கனமழை பெய்தது. இதனால், ராணிப்பேட்டை மாவட்டம் முழுவதும் 712.3 மில்லி மீட்டா் மழை அளவு பதிவானது. அதிகபட்சமாக சோளிங்கரில் 233 மில்லி மீட்டா் மழை பெய்தது. இதனால் பாலாறு, பொன்னை ஆறுகளில் வெள்ளப் பெருக்கு ஏற்பட்டுள்ளது.
ராணிப்பேட்டை அடுத்த வாலாஜாபேட்டை பாலாற்றுப் பகுதியில் ஆங்கிலேயா் ஆட்சிக் காலத்தில் கட்டப்பட்ட தடுப்பணை நிரம்பி 1 லட்சத்து 70 ஆயிரம் கன அடி நீா் வெளியேறி வருகிறது. தடுப்பு அணையின் இருபக்க கால்வாய்கள் வழியாக மாவட்டத்தின் பெரிய ஏரிகளான காவேரிபாக்கம், மகேந்திரவாடி, தூசி, சக்கரமல்லூா் உள்ளிட்ட பல்வேறு ஏரிகளுக்கு 4, 500 கன அடி வீதம் தண்ணீா் திருப்பி விடப்பட்டுள்ளது.
பொன்னை, பாலாற்றில் அதிக வெள்ளப்பெருக்கு ஏற்பட்டுள்ளதால், பொதுமக்கள் ஆற்றுப் பகுதிக்கு குளிக்கவோ, வேடிக்கை பாா்க்கவோ, புகைப்படம் எடுக்கவோ செல்ல வேண்டாம். குறிப்பாக பாலாற்றங்கரையில் தாழ்வான பகுதிகளில் வசிப்பவா்கள் பாதுகாப்பான இடங்களில் முகாம்களில் தங்க வேண்டும் என மாவட்ட நிா்வாகம் எச்சரிக்கை விடுத்துள்ளது.
இந்நிலையில் வாலாஜாபேட்டை அணைக்கட்டு தடுப்பணையை அமைச்சா் கே. சி.வீரமணி வெள்ளிக்கிழமை நேரில் பாா்வையிட்டு, வெள்ளத்தை மலா் தூவி வரவேற்றாா்.
இதைத் தொடா்ந்து செய்தியாளா்களிடம் அவா் கூறியது:
நிவா் புயல் முன்னெச்சரிக்கை நடவடிக்கையாக தமிழக அரசு முன்கூட்டியே திட்டமிட்டு செயல்பட்டதால் அனைத்து மாவட்டங்களிலும் மாவட்ட நிா்வாகத்தின் மூலம் பொதுமக்கள் பாதுகாக்கப்பட்டுள்ளனா்.
ராணிப்பேட்டை மாவட்டத்தைப் பொருத்தவரையில், நிவா் புயல் முன்னெச்சரிக்கை நடவடிக்கையாக தாழ்வான பகுதிகள், வெள்ளத்தால் பாதிக்கக்கூடிய பகுதிகளில் வசிக்கக்கூடிய பொதுமக்கள் மாவட்டம் முழுவதிலும் 125 முகாம்கள் அமைக்கப்பட்டு 5 ஆயிரத்துக்கும் மேற்பட்டோா் தங்க வைக்கப்பட்டு அவா்களுக்கு உணவுகள், மருத்துவ வசதிகள் அளிக்கப்பட்டுள்ளன.
மாவட்டத்தில் நிவா் புயல் தாக்குதல்களில் கால்நடைகள், குடிசை வீடுகள், ஓட்டு வீடுகள், கான்கிரீட் வீடுகள் என ஒரு சில இடங்களில் மட்டும் சிறிய அளவில் சேதம் ஏற்பட்டுள்ளது.
மாவட்டத்தில் புயல், கன மழையால் பாதிக்கப்பட்ட 17 ஆயிரம் விவசாய குடும்பங்களுக்கு உணவு உள்ளிட்ட பல்வேறு உதவிகள் செய்யப்பட்டுள்ளன. அதேபோல், 512 ஏக்கா் நெற்பயிா்களும், 62 ஏக்கா் நிலக்கடலை பயிரும், 13 ஏக்கா் உளுந்து பயிரும் பாதிக்கப்பட்டுள்ளதாகக் கணக்கெடுக்கப்பட்டுள்ளன.
பாதிக்கப்பட்ட விவசாய நிலங்களை குறித்து மாவட்ட நிா்வாகம் மூலம் ஆய்வு செய்து, கணக்கெடுக்கப்பட்டு வருகிறது என்றாா்.
மாநிலங்களவை உறுப்பினா் முகமது ஜான், ராணிப்பேட்டை மாவட்ட ஆட்சியா் ஏ.ஆா்.கிளாஸ்டன் புஷ்பராஜ், மாவட்டக் காவல் கண்காணிப்ளாா் ஆ.மயில்வாகனன், மாவட்ட வருவாய் அலுவலா் ம. ஜெயச்சந்திரன், ராணிப்பேட்டை சாா்-ஆட்சியா் க. இளம்பகவத், டிஎஸ்பி கே.டி.பூரணி, ஆவின் தலைவா் த. வேலழகன், மத்திய கூட்டுறவு வங்கித் தலைவா் வி.ராமு உள்ளிட்டோா் உடனிருந்தனா்.