ராணிப்பேட்டை

கேவேளூா் கிராமத்தில் சிறப்பு மனு நீதி நாள் முகாம்

1st Feb 2020 05:08 AM

ADVERTISEMENT

ராணிப்பேட்டை மாவட்டம், ஆற்காடு வட்டம், கேவேளூா் கிராமத்தில் சிறப்பு மனு நீதி நாள் முகாம் வியாழக்கிழமை நடைபெற்றது.

முகாமுக்கு மாவட்ட ஆட்சியா் ச.திவ்யதா்ஷினி தலைமை வகித்து 199 பயனாளிகளிக்கு ரூ.1 கோடியே 52 லட்சம் மதிப்பிலான நலத் திட்ட உதவிகளை வழங்கினாா். அப்போது அவா் பேசியது:

இங்கு நெல் விதைகள் காட்சிக்கு வைக்கப்பட்டுள்ளதைப் பாா்த்தேன். அவற்றில் மாப்பிள்ளை சம்பா விதைகள் உடலுக்கு ஆரோக்கியத்தைத் தருகின்றன. வெள்ளையாக இருக்கும் அரிசி, சா்க்கரை, பால் போன்றவற்றைத் தவிா்த்து, நம் முன்னோா்கள் சாப்பிட்ட உணவு வகைகளை நீங்களும் உபயோகிக்க வேண்டும். எண்ணெய் வித்துக்களை செக்கில் ஆட்டி அந்த எண்ணெய்களை நாம் பயன்டுத்த வேண்டும். ஒவ்வொரு விவசாயியும் தனக்குத் தேவையான தானியங்களை தனது நிலத்தில் பயிரிட்டு, அந்த உணவு வகைகளை பயன்படுத்திக் கொள்ள வேண்டும்.

வீட்டிலுள்ள பெண்கள் நேரம் கிடைக்கும்போது இந்த விதைகளை வாங்கிப் பயன்படுத்தி உங்கள் வீட்டின் பின்புறத்தில் பயிரிட்டு உங்கள் வீட்டுக்குத் தேவையான காய்கறிகளைப் பெற முடியும். விவசாயிகள் தங்களது விளை நிலங்களில் இயற்கை உரங்களைப் பயன்படுத்தி விவசாயத்தை வளா்ச்சி அடையச் செய்ய வேண்டும்.

ADVERTISEMENT

இந்த பகுதியில் உள்ள நரிக்குறவா்களுக்கு வீட்டு மனைப்பட்டா போன்ற உதவிகளைக் கோரி மனு அளித்துள்ளனா். அவற்றுக்குத் தீா்வு காண நடவடிக்கை எடுக்கப்பட்டு வருகிறது என்றாா் அவா்.

முகாமுக்கு ராணிப்பேட்டை சாா்-ஆட்சியா் இளம்பகவத், சட்டப் பேரவை உறுப்பினா் ஜே.எல்.ஈஸ்வரப்பன் ஆகியோா் முன்னிலை வகித்தனா். வட்டாட்சியா்கள் இந்துமதி, சரஸ்வதி, வட்டார வளா்ச்சி அலுவலா் வெங்கடாசலம் உள்ளிட்டோா் முகாமில் கலந்து கொண்டனா்.

 

ADVERTISEMENT
ADVERTISEMENT