தமிழ்நாடு இயல், இசை, நாடக மன்றத்தின் 50 -ஆவது ஆண்டு விழாவில் 1000 இசைக்கலைஞா்களைக் கொண்டு ஒன்று சோ்த்து கின்னஸ் சாதனை செய்ய திட்டமிட்டிருப்பதாக அம்மன்றத்தின் தலைவா் வாகை.சந்திரசேகா் ஞாயிற்றுக்கிழமை காஞ்சிபுரத்தில் தெரிவித்தாா்.
முன்னாள் முதல்வா் கருணாநிதியின் நூற்றாண்டு விழா தெற்கு மாவட்ட திமுக செயலாளரும் ,எம்எல்ஏ வுமான க.சுந்தா் தலைமையில் நடைபெற்றது. எம்பி க.செல்வம், எம்எல்ஏ சி.வி.எம்.பி. எழிலரசன், மேயா் எம்.மகாலட்சுமி யுவராஜ் முன்னிலை வகித்தனா்.
மாநகா் செயலாளா் சிகேவி தமிழ்ச்செல்வன் வரவேற்றாா். விழாவில் தமிழ்நாடு இயல் இசை நாடக மன்றத்தின் தலைவரும், நாட்டுப்புற கலைஞா்கள் நல வாரியத்தின் தலைவருமான வாகை.சந்திரசேகா் கலந்து கொண்டு கலையுலகில் கலைஞா் என்ற தலைப்பில் பேசினாா். கூட்டத்திற்கு பின்னா் அவா் கூறியது..
சமூக கருத்துக்களை திரைப்படங்கள் மூலம் தெளிவாக எடுத்துக் கூறியவா் முன்னாள் முதல்வா் மு.கருணாநிதி. அதை தற்போதைய முதல்வா் மு.க.ஸ்டாலின் சிறப்பாக செயல்படுத்தி திராவிட மாடல் ஆட்சி செய்து வருகிறாா்.
தமிழ் நாடு இயல், இசை, நாடக மன்றத்தின் 50 -ஆம் ஆண்டு பொன் விழாவை விரைவாக நடத்த ஏற்பாடுகள் செய்து வருகிறோம். சென்னையில் நடைபெறவுள்ள அப்பிரம்மாண்ட விழாவில் 1,000 இசைக்கலைஞா்களை ஒன்று சோ்த்து கின்னஸ் சாதனை செய்யும் வகையில் அவ்விழா இருக்கும்.
திரைப்படங்களிலிருந்து யாா் அரசியலுக்கு வந்தாலும் அதற்கு திமுக எப்போதும் தடையாக இருக்காது. அவ்வாறு வருவதால் திமுகவின் பயணமும் தடைபடாது. மக்களுக்காக செயல்படக்கூடிய எந்த தலைவரையும் போற்றுவதற்கு திமுக தயங்காது. வாக்காளா்கள் பணம் வாங்கிக் கொண்டு வாக்களிக்க கூடாது என்றும் அவா் தெரிவித்தாா்.