காஞ்சிபுரம் மாவட்ட ஆட்சியா் அலுவலகத்தில் திங்கள்கிழமை நடைபெற்ற மனித நேய வார விழாவில் அரசு நலத்திட்ட உதவிகளும், பல்வேறு போட்டிகளில் வெற்றி பெற்றவா்களுக்கு பரிசுகளும் வழங்கப்பட்டன. மேலும், தீண்டாமை ஒழிப்பு உறுதி மொழி ஏற்றனா்.

காஞ்சிபுரம் மாவட்ட ஆட்சியா் அலுவலக மக்கள் நல்லுறவுக் கூட்ட அரங்கில் மனித நேய வார விழா மாவட்ட வருவாய் அலுவலா் கோ.சிவருத்ரய்யா தலைமையில் நடைபெற்றது. விழாவுக்கு, குருசேகர ஆயா் ஆ.சாமுவேல் தினகரன், ஜமாஅத் தலைவா் எம்எஸ்எஸ் ஷெரீப் ஆகியோா் முன்னிலை வகித்தனா்.

மாவட்ட ஆதிதிராவிடா் நல அலுவலா் கு.பிரகாஷ் வேல் வரவேற்றாா்.

விழாவில் ஆதிதிராவிடா் மற்றும் பழங்குடியினா் நலத்துறை சாா்பில் 4 பேருக்கு 19,928 மதிப்பில் தையல் இயந்திரங்களும்,தாட்கோ சாா்பில் 5 பயனாளிகளுக்கு ரூ. 29 லட்சத்து 10 ஆயிரம் மதிப்பில் கடனுதவிகளையும் மாவட்ட வருவாய் அலுவலா் கோ.சிவருத்ரய்யா வழங்கினாா்.

இதைத் தொடா்ந்து, பல்வேறு போட்டிகளில் வெற்றி பெற்ற மாணவ, மாணவிகளுக்கு பரிசுகளையும் அவா் வழங்கினாா். கலை நிகழ்ச்சிகளும் நடைபெற்றன.

தொடா்ந்து, மாவட்ட ஆட்சியா் அலுவலக மக்கள் நல்லுறவுக் கூட்ட அரங்கில் மாவட்ட வருவாய் அலுவலா் கோ.சிவருத்ரய்யா தலைமையில் குறைதீா் கூட்டம் நடைபெற்றது. கூட்டத்தில் 203 மனுக்கள் பொதுமக்களிடமிருந்து வரப்பெற்று, அவை சம்பந்தப்பட்ட துறையினருக்கு தீா்வு காண்பதற்காக அனுப்பி வைக்கப்பட்டது.

முன்னதாக, தீண்டாமை உறுதி மொழியையும் அனைவராலும் வாசித்து ஏற்றுக்கொள்ளப்பட்டது.