காஞ்சிபுரம்

காஞ்சிபுரம் காமாட்சி அம்மன் அவதார தினவிழா

10th Nov 2020 10:58 PM

ADVERTISEMENT

காஞ்சிபுரம் காமாட்சி அம்மன் ஜப்பசி மாத பூர நட்சத்திரத்தில் அவதரித்த தினத்தையொட்டி, செவ்வாய்க்கிழமை சிறப்பு பாலாபிஷேகமும், விசேஷ தீபாராதனைகளும் நடைபெற்றன.

காஞ்சிபுரம் காமாட்சி அம்மன் கோயிலில் மூலவா் அமா்ந்துள்ள இடத்துக்கு வலதுபுறத்தில் உள்ள பிலாத்துவாரத்திலிருந்து அம்மன் வெளிப்பட்டு பக்தா்களுக்கு சுயம்புவாக அருள்பாலித்து வருகிறாா். ஐப்பசி மாத பூர நட்சத்திரத்தில் அம்மன் அவதரித்த திருநாளையொட்டி, ஆண்டுதோறும் ஐப்பசி மாதம் அம்மனுக்கு சிறப்பு பாலாபிஷேகமும், விசேஷ தீபாராதனைகளும், சுவாமி வீதியுலாவும் நடைபெறுவது வழக்கம்.

அம்மன் அவதார தினத்தையொட்டி, செவ்வாய்க்கிழமை மாலையில் கோயில் பணியாளா்களால் பால் குடங்கள் கொண்டு வரப்பட்டு, சிறப்பு பாலாபிஷேகம் நடைபெற்றது. 1,008 லிட்டா் பாலாபிஷேகத்தை காஞ்சி சங்கராச்சாரியாா் விஜயேந்திர சரஸ்வதி சுவாமிகள் தொடங்கி வைத்தாா்.

மூலவா் காமாட்சி அம்மன் சந்தனக் காப்பு அலங்காரத்தில் பக்தா்களுக்கு அருள்பாலித்தாா். விசேஷ தீபாராதனைகளும் நடைபெற்றன. இதைத் தொடா்ந்து, சரஸ்வதி, லட்சுமி தேவியருடன் உற்சவரான காமாட்சி அம்மன் சிறப்பு அலங்காரத்தில் கோயில் வளாகத்துக்குள் உலா வந்து நான்குகால் மண்டபத்தில் எழுந்தருளினாா். பின்னா் சியாமா சாஸ்திரிகள், சுரேஷ் சாஸ்திரிகள், கோபி சாஸ்திரிகள், நடராஜ சாஸ்திரிகள் ஆகியோரால் அம்மனுக்கு புஷ்பாஞ்சலி நடத்தப்பட்டது. புஷ்பாஞ்சலி நிகழ்ச்சிக்குப் பிறகு அம்மன் தங்கத்தேரில் கோயில் வளாகத்துக்குள் பவனி வந்து, மீண்டும் கோயில் அலங்கார மண்டபத்தை அடைந்தாா்.

ADVERTISEMENT

விழாவுக்கான ஏற்பாடுகளை ஸ்ரீகாரியம் விஸ்வநாத சாஸ்திரிகள் தலைமையிலான குழுவினா் செய்திருந்தனா். விழாவை முன்னிட்டு கோயில் வளாகம் முழுவதும் வண்ண மலா்களால் அலங்கரிக்கப்பட்டிருந்தது. விழாவில், கோயில் செயல் அலுவலா் ந.தியாகராஜன் உள்பட பலரும் கலந்து கொண்டனா்.

கரோனா அச்சுறுத்தல் காரணமாக அம்மன் புஷ்பாஞ்சலி நிகழ்ச்சியிலும், தங்கத் தேரோட்ட நிகழ்விலும் குறைந்த அளவு பக்தா்களே கலந்து கொண்டு சுவாமி தரிசனம் செய்தனா்.

 

 

 

ADVERTISEMENT

MORE FROM THE SECTION

ADVERTISEMENT