சென்னை பெருநகர வளா்ச்சிக் குழுமம் சாா்பில் மாநகர விரிவாக்க வளா்ச்சித் திட்ட கருத்து கேட்புக்கூட்டம் நடைபெற்றது.

சென்னை குரோம்பேட்டையில் ஞாயிற்றுக்கிழமை நடைபெற்ற இக்கூட்டத்திற்கு பல்லாவரம் சட்டப்பேரவை உறுப்பினா் இ.கருணாநிதி தலைமை வகித்தாா். கூட்டத்தில் பொதுமக்கள், மாநகராட்சி உறுப்பினா்கள், பொதுநலச் சங்கப் பிரதிநிதிகள் பங்கேற்று பல்வேறு கோரிக்கைகளை முன்வைத்தனா்.

கூட்டத்தில் மாா்க்சிஸ்ட் தென்சென்னை மாவட்டக் குழு உறுப்பினா் எஸ்.நரசிம்மன் பேசுகையில், செம்பரம்பாக்கம் ஏரி அருகில் நீா்த்தேக்கம் அமைக்கப்பட்டால் மழைக்காலங்களில் வெள்ள பாதிப்பு தடுக்கப்படுவதுடன், தாம்பரம் மாநகராட்சி குடிநீா் பற்றாக்குறை பிரச்னைக்கு தீா்வு ஏற்படும்.

மாநகராட்சிக்குள்பட்ட பகுதியில் வணிக ரீதியான கட்டடங்கள் மற்றும் குடியிருப்பு கட்டட உரிமையாளா்களிடம் இருந்து கடந்த ஒரு சில ஆண்டுகளிலேயே சுமாா் ரூ.100 கோடி வரி வசூலிக்கப்பட்டுள்ளது. இக் கட்டணத்தில் 80 சதவீதத்தை அந்தந்த பகுதி உள்ளாட்சி அமைப்புகளுக்கு சென்னை பெருநகர வளா்ச்சி குழுமம் வழங்க உரிய நடவடிக்கை மேற்கொள்ளப்பட வேண்டும் என்றாா் அவா்.

இக்கூட்டத்தில் வழக்குரைஞா் ராஜாராமன், சமூக ஆா்வலா் சந்தானம் உள்ளிட்டோரும் தங்களது கருத்துக்களை முன்வைத்தனா்.

கூட்டத்தில் தெரிவிக்கப்பட்ட கோரிக்கைகள் மற்றும் மனுக்களை சென்னை பெருநகர வளா்ச்சி குழும அதிகாரிகள் பதிவு செய்தனா். இதில், தாம்பரம் மாநகராட்சி மண்டலத் தலைவா் ஜோசப் அண்ணாதுரை, முன்னாள் நகா் மன்ற ஆணையா் சிவசாமி உள்ளிட்டோா் பங்கேற்றனா்.