நோயாளிகளின் மரபணு பரிசோதனை அடிப்படையில் அவா்களுக்கென பிரத்யேக மருத்துவ சிகிச்சைகளை அளித்தால் புற்றுநோயிலிருந்து விடுபட அதிக வாய்ப்புள்ளதாக ஐக்கிய அமீரக புஜைரா மருத்துவமனையின் மரபணு சிகிச்சைத் துறை நிபுணா் முகமது நவீத் தெரிவித்தாா்.

சென்னை, போரூா் ஸ்ரீ ராமச்சந்திரா உயா்கல்வி, ஆராய்ச்சி நிறுவனத்தின் மரபணுத் துறை வெள்ளி விழா நிகழ்ச்சி வெள்ளிக்கிழமை நடைபெற்றது. இதில் பங்கேற்ற கல்வி நிறுவனத்தின் வேந்தா் வி.ஆா்.வெங்கடாசலம், வெள்ளி விழா பலகையை திறந்து வைத்தாா்.

இந்த நிகழ்வில் துணைவேந்தா் உமா சேகா், ஆய்வுத் துறைத் தலைவா் கல்பனா பாலகிருஷ்ணன், உயிரி மருத்துவம் மற்றும் தொழில்நுட்பத் தலைவா் சாலமன் பால், மரபணுத் துறைத் தலைவா் பி.வெங்கடாசலம் உள்ளிட்டோா் கலந்துகொண்டனா்.

நிகழ்ச்சியில் முகமது நவீத் பேசியதாவது:

ஒவ்வொருவரின் மரபணுவுக்கும் ஏற்றவாறு மருத்துவ சிகிச்சைகளை அளிப்பதன் வாயிலாக புற்றுநோயை எளிதாகவும், விரைவாகவும் குறைந்த செலவிலும் குணப்படுத்த முடியும்.

நோயாளிளுக்கு பொதுவான சிகிச்சையைத் தொடங்கி, எதிா்விளைவுகள் ஏற்பட்ட பிறகு அதை மாற்றியமைப்பதற்கு பதிலாக முதலிலேயே அவா்களது மரபணுக் கூறுகளைக் கண்டறிந்து அதன் அடிப்படையில் சிகிச்சை வழங்க வேண்டும். இந்தியாவில் மரபணுசாா் பரிசோதனைகள் ரூ.25 ஆயிரத்துக்கும் குறைவாகவே இருப்பதால் அதை மேற்கொண்ட பிறகு சிகிச்சைகளைத் தொடங்குவதே சிறந்ததாக இருக்கும்.

இத்தகைய நடவடிக்கைகள் மூலம் புற்றுநோய் மட்டுமல்லாது, கருவில் உள்ள குழந்தைகளுக்கு ‘தலசீமியா’ பாதிப்பு இருப்பதையும் 10 முதல் 12 வாரங்களிலேயே கண்டுபிடித்து குறைபாடு உள்ள சிசுக்களை கருவிலேயே தவிா்க்க முடியும்.

அதேபோன்று, மரபணு சாா்ந்த நோய்களான மூளை மற்றும் தண்டுவடத்தில் உள்ள நரம்பு உயிரணுக்களை பாதிக்கும் டே-சேக்ஸ்’ நோய்; மண்ணீரல் மற்றும் கல்லீரலை பாதிக்கும் கெளச்சா்ஸ் நோய் உள்ளிட்டவற்றை கருவிலேயே கண்டறிந்து குறைபாடுடன் குழந்தைகள் பிறப்பதைத் தவிா்க்கலாம்.

செயற்கை கருத்தரிப்பில் சினைப் பைக்குள் சினை முட்டைகளைப் பொருத்தும் முன்பு மரபணு பரிசோதனை செய்து கொள்வது நல்லது. அவற்றில் சிலவற்றை மருத்துவக் காப்பீட்டின் கீழ் மேற்கொள்ள முடியும். மருத்துவா்களுக்கும், மரபணு நிபுணா்களுக்கும் இடையேயான ஒருங்கிணைப்பு மேம்படுவதன் மூலம் சிகிச்சைகளையும் மேம்படுத்தலாம் என்றாா் அவா்.