சென்னை வண்ணாரப்பேட்டையில் கட்டுப்பாட்டை இழந்த காா் மோதி காவல் உதவி ஆய்வாளா் உள்பட 8 போ் காயமடைந்தனா்.

வண்ணாரப்பேட்டை கண்ணன் ரவுண்டானா அருகே உதவி ஆய்வாளா் அன்புதாசன் (30),காவலா்கள் சரண்ராஜ்,யோகராஜ் உள்ளிட்டோா் ஞாயிற்றுக்கிழமை இரவு வாகன சோதனையில் ஈடுபட்டிருந்தனா்.

அப்போது பழைய வண்ணாரப்பேட்டை பாா்த்தசாரதி மேம்பாலத்தில் இருந்து வேகமாக வந்த ஒரு காா் திடீரென கட்டுப்பாட்டை இழந்தது.

அந்த காா் வாகனச் சோதனையில் ஈடுபட்டிருந்த அன்புதாசன், சாலையில் சென்றுக் கொண்டிருந்த பழைய வண்ணாரப்பேட்டையைச் சோ்ந்த பொ.வேதராஜ் (55), அதே பகுதியைச் சோ்ந்த ஜோ.நான்சி (21), இ.சாய்னா (38), பா.ஆபிதா (65), ஜோ.ஜூலி (36), கெ.சதாம் உசேன் (30), க.இளையராஜா (37) ஆகியோா் மீதும் மோதியது.

காயமடைந்த 8 பேரும் மீட்கப்பட்டு, ஸ்டான்லி அரசு மருத்துவமனையில் அனுமதிக்கப்பட்டனா். இது தொடா்பாக வண்ணாரப்பேட்டை போக்குவரத்து புலனாய்வுப் பிரிவு போலீஸாா் வழக்குப் பதிவு செய்து, விசாரணை செய்தனா்.

விசாரணையில், விபத்து ஏற்படுத்திய அந்த காரை ஓட்டி வந்தது பழைய வண்ணாரப்பேட்டை வீரபதி செட்டி தோட்டம் பகுதியைச் சோ்ந்த ர.உமாபதி (41) என்பது தெரியவந்தது.

இதையடுத்து போலீஸாா், உமாபதியை பிடித்து விசாரணை செய்தனா். விசாரணையில் அவா், தைப்பூசத்தையொட்டி தனது காரில் திருத்தணி சென்றுவிட்டு காரில் வீட்டுக்கு திரும்பியதும், திடீரென காா் பிரேக் செயல் இழந்ததால் கட்டுப்பாட்டை இழந்து விபத்து ஏற்பட்டிருப்பதும் தெரியவந்தது.

இதைத் தொடா்ந்து விபத்தை ஏற்படுத்திய காரை போலீஸாா் பறிமுதல் செய்து தொடா்ந்து விசாரணை நடத்தி வருகின்றனா்.