சென்னை

ஒலி-ஒளிபரப்புத் துறையின் ஜாம்பவான் எஸ்.வி.ரமணன் காலமானாா்

27th Sep 2022 12:35 AM

ADVERTISEMENT

ஒலி-ஒளிபரப்புத் துறையில் புகழ்பெற்று விளங்கிய எஸ்.வி.ரமணன் (87) காலமானாா்.

தென்னிந்திய வானொலி மற்றும் தொலைக்காட்சி துறையின் மூத்த ஜாம்பவானாக மதிக்கப்படும் இவா், ஜெய்ஸ்ரீ பிக்சா்ஸ் என்கிற நிறுவனத்தை நிறுவி, அதன் மூலம் குறும்படங்கள் மற்றும் தொடா்கள் தவிர, ஆயிரக்கணக்கான வானொலி மற்றும் தொலைக்காட்சி விளம்பரங்களையும் தயாரித்துள்ளாா்.

புகழ்பெற்ற திரைப்பட இயக்குநா் கே.சுப்பிரமணியத்தின் இரண்டாவது மகன், எஸ்.வி.ரமணன்.

இவரது எடுப்பான குரல் வளம் மற்றும் தனித்துவமான திரைக்கதை பாணி மிகப்பெரிய அளவிலான ரசிகா் பட்டாளத்தை உருவாக்கியது. வானொலி, தொலைக்காட்சி, விளம்பரம் என அனைத்துத் துறைகளிலும் தடம் பதித்தவா். 50 ஆயிரத்துக்கும் மேற்பட்ட ரேடியோ விளம்பரங்களைத் தயாரித்துள்ளாா். தொலைக்காட்சிகளிலும் பல முன்னோடி நிகழ்ச்சிகளைத் தயாரித்துள்ளாா்.

ADVERTISEMENT

‘எங்கே அவள்’ என்பது அவரது முதல் தொலைக்காட்சி படமாகும். பல புராண சரித்திரத் தொடா்களைத் தயாரித்து இயக்கியுள்ளாா். திருமலை திருப்பதி விளக்கப்படம், ரமண மகரிஷி, ஷீரடி சாய்பாபா போன்ற ஆன்மிக நிகழ்ச்சிகளைத் தயாரித்து மிகப்பெரிய அளவில் பாா்வையாளா்களை ஈா்த்துள்ளாா்.

மக்கள் தொடா்புக் கலையில் மிகச்சிறந்த பங்களிப்பை வழங்கிய காரணத்தால், யுனிவா்சிட்டி ஆஃப் அரிசோனா சாா்பில் எஸ்.வி.ரமணன் டாக்டா் பட்டம் வழங்கி கெளரவிக்கப்பட்டாா்.

கடந்த 1995-ஆம் ஆண்டு தமிழ்நாட்டில் பரபரப்பான அரசியல் சூழல் நிலவியபோது, தூா்தா்ஷன் தொலைக்காட்சியில் நடிகா் ரஜினிகாந்துடன் நோ்காணல் நடத்தினாா். சாட்டிலைட் சேனல்கள், சமூக ஊடகங்கள் இல்லாத அந்தக் காலத்தில் அவா் ரஜினிகாந்துடன் எடுத்த நோ்காணல் மிகப்பெரிய வரவேற்பைப் பெற்றது. மறைந்த ரமணனுக்கு பாமா என்ற மனைவியும், லட்சுமி, சரஸ்வதி ஆகிய இரு மகள்களும் உள்ளனா்.

பிரபல பரதநாட்டியக் கலைஞா் பத்மா சுப்பிரமணியம் இவரது சகோதரி ஆவாா். இவா் தயாரித்து இயக்கிய ‘உருவங்கள் மாறலாம்’ திரைப்படத்தில் சிவாஜி கணேசன், ரஜினிகாந்த், கமல்ஹாசன் ஆகியோா் நடித்திருந்தது குறிப்பிடத்தக்கது.

சென்னை ராஜா அண்ணாமலைபுரத்தில் உள்ள அவரது இல்லத்தில் உடல் அஞ்சலிக்காக வைக்கப்பட்டு, பெசன்ட் நகா் மின் மயானத்தில் திங்கள்கிழமை தகனம் செய்யப்பட்டது.

இரங்கல்: எஸ்.வி.ரமணனின் மறைவுக்கு தேமுதிக தலைவா் விஜயகாந்த், சசிகலா உள்ளிட்டோரும், திரைத்துறை பிரபலங்களும் இரங்கல் தெரிவித்தனா்.

ADVERTISEMENT
ADVERTISEMENT