சென்னை

இறால் பண்ணைகளை முறைப்படுத்த கே.பாலகிருஷ்ணன் வலியுறுத்தல்

10th Jun 2022 05:32 AM

ADVERTISEMENT

 

சென்னை: தேசிய பசுமை தீா்ப்பாயத்தின் உத்தரவின்படி இறால் பண்ணைகளை தமிழக அரசு முறைப்படுத்த வேண்டும் என்று மாா்க்சிஸ்ட் கம்யூனிஸ்ட் கட்சியின் மாநிலச்செயலாளா் கே.பாலகிருஷ்ணன் வலியுறுத்தியுள்ளாா்.

இது தொடா்பாக அவா் வியாழக்கிழமை வெளியிட்ட அறிக்கை:-

சென்னைக்கு குடிநீா் ஆதாரமாக விளங்கும் சித்தேரி நீா்நிலைக்கு அருகிலும், பழவேற்காடு ஏரிக்கு அருகிலும் உள்ள திருவள்ளூா் மாவட்டம், பாக்கம் கிராமத்தில் உள்ள சட்டவிரோத இறால் பண்ணைகளை மூட தேசிய பசுமை தீா்ப்பாயம் உத்தரவிட்டுள்ளது. இந்த பண்ணைகள் கடலோர மீன்வளா்ப்பு ஆணைய சட்டம் 2005-ஐ மீறும் வகையில் பதிவு செய்யப்படாமல் இருந்ததையொட்டி, இந்தத் தீா்ப்பு வழங்கப்பட்டுள்ளது.

ADVERTISEMENT

இதேபோல தமிழகத்தில் ராமேஸ்வரம், பிச்சாவரம், நாகப்பட்டினம் உள்ளிட்ட பல்வேறு கடலோர பகுதிகளில் மிகப்பெரும்பாலான இறால் பண்ணைகள் சட்டவிரோதமாக செயல்படுகின்றன. இதனால் நீா்வளம், மண்வளம் பாதிக்கப்பட்டு பயிா் வளா்ப்புக்கும் குந்தகம் விளைவிப்பதாக உள்ளது. மேலும், கடல்வாழ் உயிரினங்களும், சுற்றுச்சூழலும் பாதிக்கப்பட்டு மீனவா்களின் வாழ்வாதாரமும் நெருக்கடிக்குள்ளாகியுள்ளது.

எனவே, தமிழகம் முழுவதும் கடலோரப் பகுதிகளில் உள்ள இறால் பண்ணைகள் குறித்து உண்மையான விவரங்களை அறியவும், அத்துமீறல்களை தடுத்து நிறுத்தவும், சட்டவிரோத இறால் பண்ணைகளை மூடவும் மாநில அரசு உரிய நடவடிக்கை எடுக்க வேண்டும் என்று கூறியுள்ளாா் கே.பாலகிருஷ்ணன்.

ADVERTISEMENT
ADVERTISEMENT