சென்னையில் கரோனா பாதிப்பு காரணமாக அடையாறு, அண்ணா நகா், தேனாம்பேட்டை மற்றும் கோடம்பாக்கம் மண்டலங்களில் மட்டும் சுமாா் 20 ஆயிரத்துக்கும் மேற்பட்டோா் சிகிச்சை பெற்று வருவதாக மாநகராட்சி நிா்வாகம் தெரிவித்துள்ளது.
பெருநகர சென்னை மாநகராட்சி சாா்பில் கரோனா பரவலைத் தடுக்கும் வகையில் மருத்துவப் பரிசோதனையை அதிகரித்தல், பாதிப்புக்குள்ளானோரை உடனடியாக சிகிச்சைக்கு உட்படுத்துதல், காய்ச்சல் கண்டறியும் முகாம்கள், தடுப்பூசி முகாம்கள் ஆகியவை நடத்தப்படுகின்றன.
கடந்த சில மாதங்களுக்கு முன்பு வரை சென்னையில் கட்டுப்பாட்டுக்குள் இருந்த கரோனா பாதிப்பு, ஒமைக்கரான் வகை தொற்று காரணமாக மிக வேகமாகப் பரவி வருகிறது. இதில், கடந்த டிசம்பா் மாத தொடக்கத்தில் சென்னையில் நாளொன்றுக்கு சுமாா் 120-க்கும் குறைவானவா்களுக்கே தொற்று உறுதி செய்யப்பட்டு வந்த நிலையில், அந்த எண்ணிக்கை படிப்படியாக அதிகரித்து சென்னையில் அதிகபட்சமாக கடந்த இரு நாள்களுக்கு முன்பு சுமாா் 8,000 மேற்பட்டோருக்கு தொற்று கண்டறியப்பட்டது.
சிகிச்சையில்... இதுகுறித்து மாநகராட்சி அதிகாரிகள் கூறுகையில், சென்னையில் கரோனா பரவலைக் கட்டுப்படுத்தும் வகையில் நாளொன்றுக்கு சுமாா் 20 ஆயிரத்துக்கம் மேற்பட்டோருக்கு மருத்துவப் பரிசோதனை செய்யப்பட்டு வருகிறது. இருப்பினும், முகக்கவசம் அணியாதது, தனி நபா் இடைவெளியைக் கடைப்பிடிக்காதது போன்ற காரணங்களால் தொற்று அதிகமாக பரவி வருகிறது. இதில், சனிக்கிழமை நிலவரப்படி, அதிகபட்சமாக அடையாறு மண்டலத்தில் 6,423 பேரும், அண்ணா நகா் மண்டலத்தில் 5,887 பேரும், தேனாம்பேட்டை மண்டலத்தில் 5,843 பேரும், கோடம்பாக்கம் மண்டலத்தில் 5,290 பேரும் என 4 மண்டலங்களில் மட்டும் சுமாா் 20 ஆயிரத்துக்கும் மேற்பட்டோா் கரோனா பாதிப்பால் சிகிச்சை பெற்று வருகின்றனா். 15 மண்டலங்களில் சுமாா் 58 ஆயிரம் போ் மருத்துவமனைகளில் அனுமதிக்கபட்டுள்ளதுடன், வீடுகளில் தனிமைப்படுத்தப்பட்டுள்ளனா்.
8,800 மரணம்: சென்னையில் கரோனா பாதிப்பு காரணமாக இதுவரை 8,800 போ் உயிரிழந்துள்ளனா். இதில், அதிகபட்சமாக அண்ணா நகா் மண்டலத்தில் 1,024 பேரும், தேனாம்பேட்டை மண்டலத்தில் 1,009 பேரும், கோடம்பாக்கம் மண்டலத்தில் 1,002 பேரும், திரு.வி.க.நகரில் 890 பேரும், அம்பத்தூரில் 715 பேரும், அடையாறில் 710 பேரும், ராயபுரத்தில் 608 பேரும், தண்டையாா்பேட்டையில் 560 பேரும், வளசரவாக்கத்தில் 492 பேரும் என மொத்தம் 8,800 போ் உயிரிழந்துள்ளதாக மாநகராட்சி நிா்வாகம் தெரிவித்துள்ளது.