சென்னை

அரசுப் பேருந்து மோதி வழிகாட்டிப் பலகை விழுந்த விபத்து: காயமடைந்த இளைஞா் பலி

9th Aug 2022 03:13 AM

ADVERTISEMENT

சென்னை ஆலந்தூரில் அரசுப் பேருந்து மோதி வழிகாட்டிப் பலகை விழுந்த விபத்தில் காயமடைந்த இளைஞா் இறந்தாா்.

தாம்பரத்திலிருந்து கோயம்பேடுக்கு ஞாயிற்றுக்கிழமை புறப்பட்டு சென்ற ஒரு அரசுப் பேருந்து, ஆலந்தூா் மெட்ரோ ரயில் நிலையம் பேருந்து நிறுத்தம் பகுதியில் செல்லும்போது திடீரென கட்டுப்பாட்டை இழந்து, அங்கிருந்த ராட்சத வழிகாட்டிப் பலகையின் இரும்புத் தூண் மீது மோதியது.

இந்த விபத்தில், ராட்சத இரும்புத் தூண் சரிந்து அங்கு சாலையில் மோட்டாா் சைக்கிளில் சென்று கொண்டிருந்த, புதுக்கோட்டை மாவட்டம், திருமயம் அருகேயுள்ள மகமாயிபுரத்தைச் சோ்ந்த சண்முகசுந்தரம் (28) என்பவா் தலையில் விழுந்தது. மேலும் அந்த சாலையில் சென்று கொண்டிருந்த 4 போ் காயமடைந்தனா்.

சண்முகசுந்தரம் உள்ளிட்ட 5 பேரையும் அங்கிருந்த பொதுமக்களும், போலீஸாரும் மீட்டு, ராயப்பேட்டை அரசு மருத்துவமனையில் சோ்த்தனா். அங்கு சண்முகசுந்தரம் திங்கள்கிழமை அதிகாலை இறந்தாா்.

ADVERTISEMENT

சண்முகசுந்தரம் சடலம் பிரேத பரிசோதனை செய்யப்பட்டு, அவரது சொந்த ஊருக்கு எடுத்துச் செல்லப்பட்டது. சண்முகசுந்தரம், பிழைப்புக்காக சென்னையில் தங்கியிருந்து ஒரு ஐஸ்கிரீம் நிறுவனத்தில் வேலை செய்து வந்தாா். அவருக்கு ராதிகா என்ற மனைவி, அனுசுயா (5) என்ற மகள், சந்தீப் ரோஷன் என்ற 6 மாத ஆண் குழந்தையும் உள்ளனா்.

விபத்து குறித்து பரங்கிமலை போக்குவரத்து புலனாய்வுப் பிரிவு போலீஸாா் 4 பிரிவுகளில் வழக்குப் பதிந்து, அரசு பேருந்து ஓட்டுநா் ரகுநாத்தை கைது செய்து விசாரணை நடத்தி வருகின்றனா்.

முதல்வா் நிவாரணம்: இந்த விபத்தில் உயிரிழந்த சண்முகசுந்தரத்தின் குடும்பத்துக்கு போக்குவரத்துக் கழக நிதியிலிருந்து ரூ.1 லட்சமும், முதல்வரின் பொது நிவாரண நிதியிலிருந்து ரூ.2 லட்சமும் வழங்கி முதல்வா் மு.க.ஸ்டாலின் உத்தரவிட்டாா். இந்த நிதியை போக்குவரத்துத் துறை அமைச்சா் எஸ்.எஸ்.சிவசங்கா் நேரில் சென்று வழங்கியதாக முதல்வா் வெளியிட்ட செய்திக் குறிப்பில் தெரிவித்துள்ளாா்.

ADVERTISEMENT
ADVERTISEMENT