பெருநகர சென்னை மாநகராட்சிக்குட்பட்ட பகுதிகளில் புதிய சாலைப் பணிகள் மேற்கொள்ளும்போது பழைய சாலைகளை முழுவதுமாக அகற்றிவிட்டுதான் புதிய சாலைகள் அமைக்க வேண்டும் என தலைமைச் செயலா் வெ. இறையன்பு உத்தரவிட்டுள்ளாா்.

பெருநகர சென்னை மாநகராட்சியால் 387 கி.மீ. நீளமுள்ள 471 போக்குவரத்துச் சாலைகளும், 5,270 கி.மீ. நீளமுள்ள 34,640 உட்புறச் சாலைகளும் பராமரிக்கப்பட்டு வருகின்றன. இச்சாலைகளில் நாள்தோறும் தூய்மைப் பணியாளா்கள் மூலம் துப்புரவுப் பணிகள் மற்றும் சேதமடைந்த சாலைகளை கண்டறிந்து சீரமைத்தல் போன்ற பணிகள் மாநகராட்சியின் மூலம் மேற்கொள்ளப்பட்டு வருகின்றன.

ஆய்வு: அடையாறு மண்டலத்துக்கு உள்பட்ட சா்தாா் வல்லபபாய் படேல் சாலையில் 1.08 கி.மீ. நீளத்தில் ரூ.1.75 கோடி மதிப்பீட்டில் மேற்கொள்ளப்பட்டு வரும் சாலைப் பணி, வாா்டு 172-இல் அமைக்கப்பட்டுள்ள பூங்காவில் ரூ.2.23 கோடி மதிப்பில் மேற்கொள்ளப்பட்டு வரும் பணிகள், சென்னை நதிநீா் சீரமைப்பு அறக்கட்டளை மூலம் ரூ.9.41 கோடி மதிப்பீட்டில் மேற்கொள்ளப்பட்டு வரும் பூங்கா பணிகள் ஆகியவற்றை தலைமைச் செயலா் வெ.இறையன்பு ஞாயிற்றுக்கிழமை ஆய்வு செய்தாா்.

இந்த ஆய்வைத் தொடா்ந்து சென்னை மாநகராட்சிக்குட்பட்ட பகுதிகளில் புதிய சாலைப் பணிகள் மேற்கொள்ளும்போது பழைய சாலைகளை முழுவதுமாக அகற்றிவிட்டுதான் புதிய சாலைகள் அமைக்க வேண்டும். இதன் மூலம் சாலை உயரமாவது தடுக்கப்படுவதுடன், சாலையோரமுள்ள குடியிருப்புகள் மற்றும் கட்டடங்களில் மழைக் காலங்களில் நீா் புகாது என்று அதிகாரிகளுக்கு வெ.இறையன்பு உத்தரவிட்டாா்.

சென்னை மாநகராட்சிப் பகுதிகளில் பழைய சாலைகளை அகற்றாமல் புதிய சாலைப் பணிகளை மேற்கொண்டால் அதுகுறித்து 1913 என்ற புகாா் எண்ணுக்கு பொதுமக்கள் தகவல் அளிக்கலாம் என மாநகராட்சி நிா்வாகம் தெரிவித்துள்ளது.

இந்த ஆய்வின்போது, சென்னை மாநகராட்சி ஆணையா் ககன்தீப்சிங் பேடி, துணை ஆணையா்கள் எம்.எஸ்.பிரசாந்த், டி.சினேகா, வட்டார துணை ஆணையா் (தெற்கு) சிம்ரன்ஜீத் சிங் காஹ்லோன் உள்ளிட்டோா் உடனிருந்தனா்.