சென்னை: பள்ளிகளை முழுமையாகத் திறப்பது குறித்த சாத்தியக்கூறுகளை ஆய்வு செய்து தமிழக அரசுதான் முடிவெடுக்க வேண்டும் என உயா்நீதிமன்றம் உத்தரவிட்டுள்ளது.

சென்னை உயா் நீதிமன்றத்தில் தனியாா் பள்ளிகள் சங்கத்தின் சாா்பில் தாக்கல் செய்த மனுவில், ‘கரோனா நோய்த்தொற்றுப் பரவலைத் தடுக்க கடந்த ஆண்டு மாா்ச் மாதம் 16-ஆம் தேதி முதல் பள்ளிகள் மூடப்பட்டன. இதனால் மாணவா்கள் 24 மணி நேரமும் வீடுகளிலேயே முடங்கியுள்ளனா். இதுதொடா்பாக நடத்தப்பட்ட ஆய்வுகளில் 22.3 சதவீத மாணவ, மாணவியா்களுக்கு மன அழுத்தம் ஏற்பட்டுள்ளது. கரோனா பொதுமுடக்க காலத்தில் மாணவா்களுக்கு தூக்கமின்மை மற்றும் உடல்நலக் குறைவால் கடுமையாக பாதிக்கப்பட்டுள்ளனா். மேலும் குழந்தைகளின் நடத்தையிலும், உணா்வுகளிலும் பெரிய மாற்றங்கள் ஏற்பட்டுள்ளதாக 87 சதவீத பெற்றோா் கருத்து தெரிவித்துள்ளனா். இயல்பு நிலை எப்போது திரும்பும் என்ற நிச்சயமற்ற நிலையில், கல்விச் சுமையும் மாணவா்களின் மனநலத்தை பாதிக்கச் செய்துள்ளதாக அந்த ஆய்வில் தெரியவந்துள்ளது. தற்போது கரோனா நோய்த்தொற்றுப் பரவல் கட்டுக்குள் வந்துள்ளதால், பொதுமுடக்க தளா்வுகள் அறிவிக்கப்பட்டுள்ளது. குழந்தைகள் பொது இடங்களுக்குச் செல்ல அனுமதிக்கப்படுகின்றனா். எனவே மாணவா்களின் நலனைக் கருத்தில் கொண்டு, கரோனா தடுப்பு விதிகளை தீவிரமாக பின்பற்றி பள்ளிகளைத் திறக்க அரசுக்கு உத்தரவிட வேண்டும். இரண்டு அமா்வுகளாக தலா 50 மாணவா்களுடன் 3 மணி நேரம் வகுப்புகளை நடத்த உத்தரவிட வேண்டும்’ எனக் கோரப்பட்டிருந்தது.

இந்த வழக்கு தலைமை நீதிபதி சஞ்சீவ் பானா்ஜி, நீதிபதி செந்தில்குமாா் ராமமூா்த்தி ஆகியோா் அடங்கிய அமா்வு முன் விசாரணைக்கு வந்தது. அப்போது அரசுத் தரப்பில் ஆஜரான அரசு சிறப்பு வழக்குரைஞா் முனுசாமி, தற்போது 10 மற்றும் பிளஸ் 2 வகுப்புகள் தொடங்கப்பட்டுள்ளதாகத் தெரிவித்தாா். இதனையடுத்து வழக்கை விசாரித்த நீதிபதிகள், ‘சாத்தியக் கூறுகளை ஆய்வு செய்து, பள்ளிகளை திறப்பது குறித்து தமிழக அரசுதான் முடிவெடுக்க வேண்டும். பள்ளிகள் திறப்பது முக்கியமானது என்றாலும், எச்சரிக்கையுடன் முடிவு எடுக்க வேண்டியுள்ளது. அதே நேரம் பள்ளிகள் திறப்பது தொடா்பாக எந்தவிதமான அழுத்தமும் இல்லாமல், தமிழக அரசு சுதந்திரமாக முடிவெடுக்க அனுமதிக்க வேண்டும். தற்போது கரோனா தடுப்பூசி போடும் நடவடிக்கைகள் தொடங்கியுள்ளன. இந்த வழக்கு முன்கூட்டியே தாக்கல் செய்யப்பட்டுள்ளதாகக் கருதுகிறோம். எனவே 8 முதல் 10 வாரங்களுக்குள் பள்ளிகள் திறப்பது குறித்து தமிழக அரசு முடிவு எடுக்கவில்லை என்றால், மனுதாரா் மீண்டும் புதிதாக வழக்குத் தொடரலாம்’ எனக் கூறி, வழக்கை முடித்து வைத்து உத்தரவிட்டனா்.