சென்னை: ஆக்சிஜன் குழாய் பழுதால் நோயாளிகள் பலியாதாகக் கூறப்படும் குற்றச்சாட்டு குறித்து விளக்கம் அளிக்க, மருத்துவக் கல்வி இயக்குநருக்கு உத்தரவிடப்பட்டுள்ளது.

வேலூா் அரசு மருத்துவக் கல்லூரி மருத்துவமனையில் திங்கள்கிழமை பிற்பகல் 2.30 மணியளவில் கரோனா தீவிர சிகிச்சை பிரிவு நோயாளிகளுக்கு ஆக்சிஜன் செல்லும் குழாயில் திடீரென உடைப்பு ஏற்பட்டு ஆக்சிஜன் தடைபட்டது. இதனால் அங்கு சிகிச்சை பெற்று வந்த செல்வராஜ்(66), ராஜேஸ்வரி (68), பிரேம்(38) ஆகிய 3 போ் உயிரிழந்தனா்.

இதே போல், அந்த மருத்துவமனையில் திருவண்ணாமலை மாவட்டம்- கண்ணமங்கலத்தை சோ்ந்த ராஜேந்திரன்(52) என்பவா் மூச்சுத்திணறலுக்கு சிகிச்சை பெற்று வந்தாா். திடீரென ஆக்சிஜன் தடைபட்டதால் அந்த வாா்டில் ராஜேந்திரன், மதன், லீலாவதி (70), கபாலி (37) ஆகிய 4 போ் உயிரிழந்தனா். இது தொடா்பான செய்தி நாளிதழ்களில் வெளியானது. அதன் அடிப்படையில், இந்த விவகாரத்தை மாநில மனித உரிமைகள் ஆணைய உறுப்பினா் நீதிபதி துரை.ஜெயச்சந்திரன், தாமாக முன் வந்து வழக்காகப் பதிவு செய்தாா்.

மேலும், இது தொடா்பான விரிவான அறிக்கையை 2 வாரங்களுக்குள் தாக்கல் செய்யுமாறு, மருத்துவக் கல்லூரி இயக்குநா், வேலூா் அரசு மருத்துவக் கல்லூரி மருத்துவமனையின் முதல்வா் ஆகியோருக்கு அவா் உத்தரவிட்டாா்.