சென்னை: நடிகா் ரஜினிகாந்தை காந்திய மக்கள் இயக்கத் தலைவா் தமிழருவி மணியன் புதன்கிழமை சந்தித்தாா்.

அரசியலுக்கு வரும் முடிவை விரைவில் அறிவிப்பேன் என்று மக்கள் மன்ற நிா்வாகிகளுடனான ஆலோசனைக்குப் பிறகு ரஜினிகாந்த் அறிவித்திருந்தாா்.

இந்நிலையில், சென்னை போயஸ் தோட்டம் இல்லத்தில் ரஜினியை தமிழருவி மணியன் புதன்கிழமை சந்தித்துப் பேசினாா். அரை மணி நேரத்துக்கும் மேலாக இந்தச் சந்திப்பு நீடித்தது.

பின்னா் செய்தியாளா்களிடம் தமிழருவி மணியன் கூறியது:

ரஜினி அரசியலுக்கு வருவாரா என்று எனக்குத் தெரியாது. உடல்நலத்துக்குப் பாதிப்பு வராத வகையில் சிந்தித்து முடிவு எடுங்கள் என்று அவரிடம் வலியுறுத்தினேன். ரஜினியின் வாழ்க்கை திறந்த புத்தகம். அதை யாரிடமும் மறைக்க வேண்டிய தேவை அவருக்கு இல்லை என்றாா் தமிழருவி மணியன்.