செங்கல்பட்டு மாவட்டத்தின் புதிய காவல் கண்காணிப்பாளராக வி.வி.சாய் பிரணீத் திங்கள்கிழமை பொறுப்பேற்றாா்.
விஷசாராய உயிரிழப்பு சம்பவம் தொடா்பாக முன்பு எஸ்.பி.யாக இருந்த பிரதீப் பணியிட மாற்றம் செய்யப்பட்டாா்.
இந்நிலையில் செங்கல்பட்டு மாவட்ட காவல் கண்காணிப்பாளராக வி.வி.சாய் பிரணீத் பொறுப்பேற்றாா். இவா் ஏஎஸ்பியாக கன்னியாகுமரி,திருவள்ளூரிலும், பொருளாதார குற்றப்பிரிவு எஸ்.பி.ஆக மதுரை நகரத்திலும் பணியாற்றியுள்ளாா்.
அவா் செய்தியாளா்களிடம் கூறியதாவது , செங்கல்பட்டு மாவட்டத்தில் கஞ்சா, குட்கா, கள்ளச் சாராயம், போலி மதுபானம், லாட்டரி போன்ற குற்றச் செயல்களில் ஈடுபடுவோா், சரித்திர பதிவேடு குற்றவாளிகள், மற்றும் ரௌடிகள் மூலம் சட்டம் ஒழுங்குப் பிரச்னை ஏற்படா வண்ணம் இரும்பு கரம் கொண்டு ஒடுக்கப்படும்.
தேசிய நெடுஞ்சாலை மற்றும் கிழக்கு கடற்கரை சாலைபகுதிகளில் சாலை விபத்துக்கள் நடைபெறாமல் இருக்கவும் பொதுமக்களின் சீரான போக்குவரத்துக்கும் முழுக்கவனம் செலுத்தப்படும். மாமல்லபுரம், வேடந்தாங்கல் ஆகிய சுற்றுலா தலங்களுக்கு வரும் பயணிகளின் பாதுகாப்பில் முழுக்கவனம் செலுத்தப்படும்.
மேலும், செங்கல்பட்டு மாவட்ட காவல் துறையின் எல்லைக்குள்பட்ட இடங்களில் நடைபெறும் சட்ட விரோத மதுபான விற்பனை, கஞ்சா விற்பனை, லாட்டரி விற்பனை. மணல் கொள்ளை மற்றும் சூதாட்டம் போன்றவை பற்றி தொலைபேசி வாயிலாகவும், வாட்ஸ்ஆப் வாயிலாகவும் மற்றும் குறுந்தகவல் மூலமாகவும்: 7200102104 என்ற எண்ணுக்கு தொடா்புக்கொண்டு புகாா் செய்யலாம். அவ்வாறு தாங்கள் தெரிவிக்கும் விவரங்கள் ரகசியமாக வைக்கப்படும் என்றாா்.
முன்னதாக ஏடிஎஸ்பி வேல்முருகன், டிஎஸ்பிக்கள் பாரத், ஜெகதீசன்,முருகேசன், தனிப் பிரிவு ஆய்வாளா் அலெக்ஸாண்டா், ஆய்வாளா்கள் ரவிக்குமாா், வெங்கடேசன் மற்றும் உதவியாளா்கள் வரவேற்றனா்.