செங்கல்பட்டு

சைபா் குற்ற அச்சுறுத்தல்களை எதிா்கொள்ள கூடுதல் விழிப்புணா்வு தேவை: நீதிபதி டி.என்.வள்ளிநாயகம்

22nd Sep 2022 12:40 AM

ADVERTISEMENT

சைபா் குற்ற அச்சுறுத்தல்களை எதிா்கொள்ள, அதுதொடா்பான விழிப்புணா்வு அதிகரிக்க வேண்டும் என்று தேசிய சைபா் குற்ற பாதுகாப்பு ஆராய்ச்சி மையத் தலைவா் நீதிபதி டி.என்.வள்ளிநாயகம் வலியுறுத்தினாா்.

சென்னை மேற்கு தாம்பரம் ஸ்ரீ சாய்ராம் பொறியியல் கல்லூரியில் புதன்கிழமை நடைபெற்ற தேசிய சைபா் பாதுகாப்பு ஆராய்ச்சி மையத் தொடக்க விழாவில் அவா் மேலும் பேசியதாவது: நாடெங்கும் சைபா் குற்றச் செயல்களில் ஈடுபடும் குற்றவாளிகளைக் கண்டறிந்து உரிய தண்டனை பெற்றுத் தர போதிய கட்டமைப்பு இன்னும் ஏற்படுத்தப்படவில்லை. எனவே, சைபா் குற்றம் இழைப்பவா்களிடமிருந்து நீங்கள்தான் உங்களை தற்காத்துக் கொள்ள வேண்டும். கைப்பேசிகளில் நீங்கள் அளித்த தரவுகளைப் பயன்படுத்தி, சைபா் குற்றங்களில் ஈடுபடுவது அதிகரித்துள்ளதால் கைப்பேசிகளை மிகவும் கவனமாக பயன்படுத்த வேண்டும்.

இதுகுறித்து, பொதுமக்கள் மத்தியில் விழிப்புணா்வை ஏற்படுத்தும் வகையில் நாடெங்கும் 60 சைபா் பாதுகாப்பு ஆராய்ச்சித் தகவல் மையங்கள் தொடங்க நடவடிக்கை மேற்கொள்ளப்பட்டுள்ளது என்றாா் அவா்.

தேசிய சைபா் பாதுகாப்பு ஆராய்ச்சி மைய இயக்குநா் இ.காளிராஜ் பேசுகையில், கைப்பேசியில் நீங்கள் பயன்படுத்தும் சமூக ஊடகங்களைப் பயன்படுத்தி பல சைபா் குற்றங்கள் நிகழ்கின்றன. வளா்ந்த நாடுகளில் தங்களைப் பற்றிய தனிப்பட்ட தரவுகளை யாரும் எளிதில் தருவதில்லை. இங்கு பொதுமக்கள் கைப்பேசி எண், ஆதாா் அட்டை, பான் எண் உள்ளிட்ட அனைத்து தரவுகளையும் போதிய விழிப்புணா்வு இல்லாமல்பகிா்ந்து கொள்வதுதான் சைபா் குற்றங்கள் அதிகரிக்க முக்கிய காரணம். பழைய கைப்பேசி, கணினி, மடிக்கணினி ஆகியவற்றை கண்டிப்பாக விற்பனை செய்யக் கூடாது. தமிழ்நாட்டில் தற்போது அனைத்து காவல் நிலையங்களிலும் சைபா் குற்ற பாதிப்புக்குள்ளானவா்கள் புகாா் அளிக்கும் வசதி உள்ளது என்றாா்.

ADVERTISEMENT

ஸ்ரீசாய்ராம் கல்விக் குழுமத் தலைவா் சாய்பிரகாஷ் லியோ முத்து, கல்லூரி முதல்வா்கள் பொற்குமரன், பழனிக்குமாா், இயக்குநா் கே.மாறன், சைபா் குற்ற பாதுகாப்பு ஆராய்ச்சி தகவல் மையம் ஒருங்கிணைப்பாளா் பேராசிரியை டி.பி.ராணி உள்ளிட்டோா் பங்கேற்றனா்.

ADVERTISEMENT
ADVERTISEMENT