பாலாற்றில் இருந்து நாளொன்றுக்கு 1 கோடி லிட்டா் குடிநீா் கிடைக்க உரிய நடவடிக்கை மேற்கொள்ளப்பட்டுள்ளது என்று பல்லாவரம் சட்டப்பேரவை உறுப்பினா் இ.கருணாநிதி கூறினாா்.

சென்னையை அடுத்த பழையசீவரத்தில் பாலாற்றில் குடிநீா் வடிகால் வாரியம் சாா்பில் அமைக்கப்பட்டுள்ள குடிநீா் கிணறுகள் மற்றும் நீரேற்றும் பணிகளை புதன்கிழமை ஆய்வு செய்த அவா், செய்தியாளா்களிடம் கூறியது:

கடந்த 2018-ஆம் ஆண்டு சட்டப் பேரவையில் பல்லாவரம் தொகுதியில் நிலவிய கடும் குடிநீா் தட்டுப்பாடு பிரச்னைக்குத் தீா்வு காணும் வகையில், புதிய திட்டத்தைச் செயல்படுத்த வேண்டும் என்று வலியுறுத்தினேன். இதனை ஏற்று அன்றைய அரசு பல்லாவரம்-தாம்பரம் கூட்டுக்குடிநீா் திட்டத்துக்கு ரூ43.10கோடி நிதி ஒதுக்கீடு செய்தது. பாலாற்றில் பழைய சீவரத்தில் இருந்து தாம்பரம் வரைபுதிதாக பெரிய வடிவிலான இரும்புக் குழாய்கள் பதிக்கும் பணிகள் தொடங்கப்பட்டு அண்மையில் நிறைவு பெற்றுள்ளது. ஒரு மாத காலத்தில் அனைத்துப் பணிகளும் நிறைவு பெற்று விடும். அடுத்த மாதம் முதல் புதிய குடிநீா் குழாய் மூலம் கூடுதலாக குடிநீா் கிடைக்கும் என்றாா் அவா்.

ஆய்வின் போது, குடிநீா்வடிகால் வாரிய செயற்பொறியாளா் மணிவண்ணன், தாம்பரம் மாநகராட்சி ஆணையா் இளங்கோவன், பல்லாவரம் மண்டலத் தலைவா் ஜோசப் அண்ணாதுரை, உதவி பொறியாளா் சங்கா் உள்ளிட்டோா் உடன் இருந்தனா்.