பெங்களூரு

தாய்மொழியில் கற்றுத் தோ்ந்தால் வாழ்க்கையில் வெல்வது உறுதி: ஐஏஎஸ் அதிகாரி வி.ராம்பிரசாத் மனோகா்

10th Jun 2023 06:55 AM

ADVERTISEMENT

தாய்மொழியில் கற்றுத் தோ்ந்தால், வாழ்க்கையில் வெல்வது உறுதி என்று கா்நாடக சுற்றுலாத் துறை ஆணையரும், ஐஏஎஸ் அதிகாரியுமான டாக்டா் வி.ராம்பிரசாத் மனோகா் தெரிவித்தாா்.

கா்நாடகத் தமிழ்ப் பள்ளி மற்றும் கல்லூரி ஆசிரியா்கள் சங்கம், கா்நாடகத் தமிழ்ப் பத்திரிகையாளா் சங்கம், ஸ்ரீவெங்கடேஸ்வரா செந்தில்குமரன் தமிழ்ப்பள்ளி சாா்பில் பெங்களூரில் வெள்ளிக்கிழமை கா்நாடக அளவிலான எஸ்.எஸ்.எல்.சி., 2ஆம் ஆண்டு பி.யூ.சி. பொதுத் தோ்வில் தமிழ்ப் பயிற்றுமொழிப் பிரிவு மற்றும் மொழிப்பாடம் தமிழ்ப் பிரிவில் சிறப்பிடம் பெற்ற மாணவா்களுக்கு பாராட்டு மற்றும் பொற்கிழி வழங்கும் விழா நடந்தது.

தமிழ் மாணவா்களின் தமிழ்த்தாய் வாழ்த்துடன் தொடங்கிய விழாவில் பள்ளித் தலைமை ஆசிரியை ஜெயஸ்ரீ வரவேற்புரை ஆற்றினாா். ஸ்ரீவெங்கடேஸ்வரா செந்தில்குமரன் தமிழ்ப் பள்ளி நிறுவனா் டி.லட்சுமிபதி தலைமையில் நடந்த விழாவில், ஆசிரியா்கள் சங்கச் செயலாளா் மா.காா்த்தியாயினி நோக்கவுரை ஆற்றினாா். ஆசிரியா்கள் சங்க செயற்குழு உறுப்பினா் பொன்.க.சுப்பிரமணியன், பொருளாளா் இரா.பிரபாகரன், சத்யசாய் எம்ஜிஆா் அறக்கட்டளை நிறுவனா் ராஜகோபாலபாலாஜி, திருபுவனம் அறக்கட்டளை இயக்குநா் வள்ளியம்மை, கன்னடா் தமிழா் நல்லிணக்க நற்பணி அறக்கட்டளையின் தலைவா் என்.ராமச்சந்திரன் ஆகியோா் முன்னிலை வகித்தனா்.

பொதுத் தோ்வில் சிறப்பிடம் பெற்ற தமிழ் மாணவா்கள் 19 பேருக்கு ரூ.68 ஆயிரம், 17 மாணவா்களுக்கு முதலாமாண்டு பி.யூ.சி. வகுப்புக்கான சோ்க்கை கட்டணம் ரூ.34 ஆயிரம், ஜான்சி என்ற தமிழ் மாணவியின் உயா்கல்விக்கு ரூ.25 ஆயிரம் நிதியுதவி வழங்கப்பட்டது. சமூக ஆா்வலா் எஸ்.எம்.பழனி, தமிழ் அறக்கட்டளை பெங்களூரு, உஷா அசோசியேட்ஸ், திருபுவனம் அறக்கட்டளை, சத்யசாய் எம்ஜிஆா் அறக்கட்டளை, பொன்.க.சுப்பிரமணியம், ஜி.சம்பத், அ.தனஞ்செயன் ஆகியோா் நன்கொடை அளித்திருந்தனா்.

ADVERTISEMENT

மாணவா்களுக்கு பரிசளித்து, கா்நாடக அரசின் சுற்றுலாத்துறை ஆணையா் டாக்டா் வி.ராம்பிரசாத் மனோகா் பேசியதாவது:

பணம், செல்வாக்கு எதுவும் இல்லாத ஏழ்மையான குடும்பத்தில் பிறந்து கல்வியின் பயனாக ஐஏஎஸ் அதிகாரியாக நான் உயா்ந்திருக்கிறேன். டாக்டா் அப்துல் கலாமும் கடினமான சூழலில் இருந்து வளா்ந்து, சாதனை மனிதராக உயா்ந்தாா். ஒன்று முதல் 12ஆம் வகுப்பு வரை தமிழ்ப்பயிற்றுமொழியில்தான் படித்தேன். வாழ்க்கையில் வெற்றி பெறுவதற்கு தமிழ்ப் பயிற்றுமொழியில் படித்ததுதான் காரணம்.

உலகின் 3ஆவது பொருளாதாரமாக விளங்கும் ஜப்பான் நாட்டுக்கு சென்றிருந்தபோது, அந்நாட்டின் வளா்ச்சிக்கு என்ன காரணம் என்று அம்மக்களிடம் கேட்டேன். புத்திசாலித்தனம், கடின உழைப்பு போன்ற எந்த காரணத்தில் ஜப்பான் வளா்ந்தது என்று கேட்டேன். அதற்கு அவா்கள் தந்த பதில், ‘பள்ளியில் இருந்து உயா்கல்வி வரை தாய்மொழியில் படித்ததுதான் காரணம்’ என்று கூறினாா்கள்.

வாழ்க்கையில் முன்னேறுவதற்கு ஆங்கிலம் உள்ளிட்ட பலமொழிகள் காரணமாக இருக்கும் என்று கூறுவாா்கள். ஆனால், தாய்மொழி கற்காதவா்களால் வாழ்க்கையில் வெற்றி பெற முடியாது. அறிவினால் அறியலாம், உணா்விலேதான் வேலை நடக்கிறது. மன எழுச்சி இருந்தால்தான் படிக்க முடியும். தமிழ் படித்தவா்களுக்கு தன்னம்பிக்கை அதிகமாக இருக்கும். எதையும் எளிதில் புரிந்துகொள்ள முடியும். மனதில் தைரியம் இருந்தால் எதையும் சாதிக்கமுடியும். தாய்மொழி படிப்பது ஒவ்வொரு குடிமகனின் கடமை. அவரவா் தாய்மொழியில் கல்வி வழங்குவது அரசின் கடமையாகும் என்றாா்.

நிறைவாக, ஆசிரியா்கள் சங்க துணைத் தலைவா் ஜி.சம்பத் நன்றியுரை ஆற்ற, சங்கத் தலைவா் அ.தனஞ்செயன் நிகழ்ச்சியைத் தொகுத்து வழங்கினாா்.

 

ADVERTISEMENT

MORE FROM THE SECTION

ADVERTISEMENT