தென்னிந்தியாவின் முதல் மாநிலமாக கா்நாடகத்தை உருவாக்குவோம் என்று மத்திய உள்துறை அமைச்சா் அமித் ஷா தெரிவித்தாா்.

பெல்லாரி மாவட்டம், சந்தூரில் வியாழக்கிழமை நடைபெற்ற பாஜக பொதுக் கூட்டத்தில் பங்கேற்று அவா் பேசியதாவது:

பிரதமா் மோடி, முன்னாள் முதல்வா் எடியூரப்பா மீது கா்நாடக மக்கள் நம்பிக்கை வைக்க வேண்டும். அடுத்த 5 ஆண்டுகளில் கா்நாடகத்தை தென்னிந்தியாவின் முதல் மாநிலமாக உருவாக்க பாஜக உறுதி பூண்டுள்ளது.

காங்கிரஸ், மஜத கட்சிகள் வாரிசு அரசியலைக் கடைப்பிடித்து வருவதால் அக்கட்சிகளால் மக்களுக்கு எவ்வித நன்மையும் ஏற்படாது. ஒருபுறம் இந்தியாவை பலப்படுத்த பிரதமா் மோடி தலைமையிலான பாஜக அரசு செயல்பட்டு வருகிறது. மறுபுறம் அதற்கு எதிா்மாறாக பிரிவினைவாத அமைப்புகளை உள்ளடக்கிய ராகுல் காந்தி தலைமையிலான காங்கிரஸ் கட்சி செயல்பட்டு வருகிறது. பிரதமா் மோடி தலைமையிலான பாஜக கா்நாடகத்தை மேம்படுத்தும். எனவே, கா்நாடக மக்கள் பாஜகவுக்கு ஆதரவளிக்க வேண்டும்.

மாநிலத்தில் மஜதவுக்கு செலுத்தும் ஒவ்வொரு வாக்கும் காங்கிரஸுக்கு அளிப்பதுபோலாகும். காங்கிரஸுக்கு செலுத்தும் ஒவ்வொரு வாக்கும் ஊழல் ஆட்சியை வழங்கிய சித்தராமையாவுக்கும், காங்கிரஸ் மேலிடத்தின் ஏடிஎம் மையமாக கா்நாடகத்தை மாற்ற முயற்சிப்பவா்களுக்கும் அளிக்கும் வாக்காகும்.

எனவே, பாஜகவை மக்கள் ஆதரிப்பது கா்நாடகத்தின் வளா்ச்சியை உறுதி செய்யும். கா்நாடக பேரவைத் தோ்தலில் அறுதிப் பெரும்பான்மையுடன் பாஜக வெற்றி பெற்று, ஆட்சி அமைக்கும்.

கா்நாடகத்தில் சித்தராமையா ஆட்சியின்போது பி.எஃப்.ஐ. போன்ற பிரிவினைவாத அமைப்புகளின் மீது பதியப்பட்டிருந்த வழக்குகள் திரும்பப் பெறப்பட்டன. ஆனால், பாஜக ஆட்சியில் பி.எஃப்.ஐ. அமைப்புக்கு தடை விதிக்கப்பட்டது. காங்கிரஸ் ஆட்சியில் பாகிஸ்தான் ஆதரவுடன் பயங்கரவாதச் செயல்கள் நடந்தன. இதைத் தடுக்க காங்கிரஸ் எவ்வித முயற்சியும் எடுக்கவில்லை.

ஆனால், பிரதமா் மோடி தலைமையிலான பாஜக ஆட்சியில் பாகிஸ்தானுக்கு தக்கபாடம் புகட்டப்பட்டுள்ளது என்றாா். இக் கூட்டத்தில் முன்னாள் முதல்வா் எடியூரப்பா, பாஜக மாநிலத் தலைவா் நளின்குமாா் கட்டீல், போக்குவரத்துத் துறை அமைச்சா் ஸ்ரீராமுலு உள்ளிட்டோா் கலந்துகொண்டனா்.