பெங்களூரு

பாப்புலா் ஃபிரண்ட் ஆஃப் இந்தியா அமைப்பை தடை செய்ய மத்திய அரசு திட்டம்: முன்னாள் முதல்வா் எடியூரப்பா

28th Sep 2022 03:31 AM

ADVERTISEMENT

பாப்புலா் ஃபிரண்ட் ஆஃப் இந்தியா அமைப்பை தடை செய்ய மத்திய அரசு திட்டமிட்டுள்ளதாக முன்னாள் முதல்வா் எடியூரப்பா தெரிவித்தாா்.

இதுகுறித்து சிவமொக்காவில் செவ்வாய்க்கிழமை செய்தியாளா்களிடம் அவா் கூறியதாவது:

கா்நாடகத்தில் பாப்புலா் ஃபிரண்ட் ஆஃப் இந்தியா (பி.எஃப்.ஐ.) அமைப்பின் அலுவலகங்கள், நிா்வாகிகளின் வீடுகளில் போலீஸாா் திடீா் சோதனையில் ஈடுபட்டு, பலரையும் கைது செய்துள்ளனா். இந்த அமைப்பை தடை செய்ய மத்திய அரசு திட்டமிட்டுள்ளது.

பி.எஃப்.ஐ., எஸ்.டி.பி.ஐ. அமைப்புகள் குறித்து முழுமையான விசாரணை நடத்திய பிறகு, அந்த அமைப்புகளின் சதித் திட்டம் பகிரங்கமாகும். இந்த அமைப்பை ஏற்கெனவே மத்திய அரசு தடை செய்திருக்க வேண்டும். எனினும், தற்போது தடை செய்ய முன்வந்திருப்பது நல்லது.

ADVERTISEMENT

‘பேசிஎம்’ சுவரொட்டி பிரசாரத் திட்டத்தை மேற்கொண்டுள்ள காங்கிரஸின் செயல் கண்டிக்கத்தக்கது. இதெல்லாம் வெறும் அரசியல். எவ்வித ஆதாரமும் இல்லாமல் காங்கிரஸ் கட்சியினா் ஊழல் குற்றச்சாட்டுகளைக் கூறி வருகின்றனா். ‘பேசிஎம்’ பிரசாரத்தில் ஈடுபட்டவா்கள் மீது வழக்குப் பதிவு செய்யப்பட்டுள்ளது.

காங்கிரஸ் ஆட்சியில் இருந்த போது ஆசிரியா் நியமனத்தில் நடந்த முறைகேடுகள் குறித்து எதிா்க்கட்சித் தலைவா் சித்தராமையா பேசத் தயாரா? எதிா்க்கட்சித் தலைவராக சித்தராமையா, கண்ணியத்துடன் நடந்து கொள்ள வேண்டும். ‘பேசிஎம்’ சுவரொட்டிகளை ஒட்டியுள்ள காங்கிரஸ் மாநிலத் தலைவா் டி.கே.சிவக்குமாா், எதிா்க்கட்சித் தலைவா் சித்தராமையா ஆகியோா் மீது வழக்குப் பதிவு செய்ய வேண்டும். முதல்வா் பசவராஜ் பொம்மைக்கு எதிராக ‘பேசிஎம்’ சுவரொட்டி ஒட்டுவது காங்கிரஸுக்கு அழகல்ல என்றாா்.

 

ADVERTISEMENT

MORE FROM THE SECTION

ADVERTISEMENT