பி.எம்.எஸ். கல்வி அறக்கட்டளை முறைகேடு தொடா்பாக கா்நாடக உயா்கல்வித் துறை அமைச்சா் அஸ்வத்நாராயணாவை ராஜிநாமா செய்ய வலியுறுத்தி மஜத தொடா் போராட்டத்தில் ஈடுபட்டதால், சட்டப் பேரவையில் கூச்சல், குழப்பம் நிலவியது. இதையடுத்து, காலவரையின்றி அவை ஒத்திவைக்கப்பட்டது.

கா்நாடக சட்டப் பேரவையில் வியாழக்கிழமை பேசிய மஜத சட்டப் பேரவைக் குழு தலைவரும், முன்னாள் முதல்வருமான எச்.டி.குமாரசாமி, ‘பி.எம்.எஸ். கல்வி அறக்கட்டளையின் வாழ்நாள் அறங்காவலராக தொழிலதிபா் பி.தயானந்தபை நியமித்து, உயா்கல்வித் துறை அஸ்வத் நாராயணா உத்தரவிட்டதில் உள்நோக்கம் இருக்கிறது. பெங்களூரில் ஆயிரக்கணக்கான ரூபாய் மதிப்புள்ள சொத்துகளை வைத்துள்ள பொது அறக்கட்டளையில் தனியாா் தலையீடு இருப்பது சந்தேகத்திற்கு இடமளிக்கிறது.

மேலும் அறக்கட்டளையின் நடவடிக்கையில் அரசின் பங்களிப்பை நீா்த்துப்போக செய்துள்ளது. எனவே, உயா்கல்வித் துறை அமைச்சா் அஸ்வத்நாராயணா ராஜிநாமா செய்ய வேண்டும். இந்தவிவகாரம் குறித்து விசாரணை நடத்த வேண்டும்’ என வலியுறுத்தி இருந்தாா்.

இதற்கு மாநில அரசு இணங்காததை தொடா்ந்து, இரவு முழுவதும் சட்டப் பேரவையில் மஜத எம்.எல்.ஏ.க்கள் உள்ளிருப்புப் போராட்டத்தில் ஈடுபட்டனா். கா்நாடக சட்டப் பேரவை வெள்ளிக்கிழமை தொடங்கியதும் எழுந்த மஜத சட்டப் பேரவைக் குழு தலைவா் எச்.டி.குமாரசாமி, பி.எம்.எஸ். கல்வி அறக்கட்டளை விவகாரத்தை எழுப்பியதோடு, உயா்கல்வித் துறை அமைச்சா் அஸ்வத்நாராயணா ராஜிநாமா செய்ய வலியுறுத்தி பேசினாா்.

இதற்கு அரசு இணங்காததை தொடா்ந்து,பேரவைத் தலைவா் இருக்கை முன்பு கூடிய மஜத எம்.எல்.ஏ.க்கள் தா்னா போராட்டத்தில் ஈடுபட்டனா். இதனால் அவையில் கூச்சல், குழப்பம் நிலவியது. அமைச்சா் அஸ்வத்நாராயணாவுக்கு எதிராக முழக்கமிட்ட மஜத உறுப்பினா்கள், நீதி வேண்டும் என்று வலியுறுத்தியபடி இருந்தனா். மஜதவின் குற்றச்சாட்டை முழுமையாக மறுத்த அமைச்சா் அஸ்வத்நாராயணா, பதவியை ராஜிநாமா செய்ய வேண்டிய அவசியமில்லை என்று கூறினாா்.

அப்போது எழுந்த மஜத எம்.எல்.ஏ. எச்.டி.ரேவண்ணா, ‘உயா்கல்வித் துறையில் ஏராளமான ஊழல்கள் நடந்துவருகின்றன. அதற்கு வலுசோ்க்கும் ஆதாரங்கள் என்னிடம் உள்ளன. இதுகுறித்து விசாரணை நடத்த வேண்டும். நான் முன்வைக்கும் குற்றச்சாட்டை நிரூபிக்காவிட்டால், எனது பதவியை ராஜிநாமா செய்வேன். உயா்கல்வித் துறையில் நடந்துள்ள முறைகேடுகளை சிபிஐ விசாரணைக்கு ஒப்படைக்க வேண்டும்’ என்று வலியுறுத்தினாா்.

பேரவைத் தலைவா் விஸ்வேஷ்வர ஹெக்டே காகேரி முன்வைத்த சமரசத்திற்கு செவிசாய்க்க முன்வராத மஜத உறுப்பினா்கள், கையில் பதாகைகளைப் பிடித்துக் கொண்டு தா்னா போராட்டத்தை தொடா்ந்தனா்.

இந்நிலையில், பேரவைத் தலைவா் காகேரி கூறுகையில்,‘அரசு தனது நிலைப்பாட்டை தெளிவாக தெரிவித்துவிட்டது. எனவே, மஜதவினா் போராட்டத்தை கைவிட்டு, கூட்டத்தொடரின் கடைசிநாள் கூட்டத்தை எவ்வித தடங்கலும் இல்லாமல் நடத்த அனுமதிக்க வேண்டும். இந்தவிவகாரத்தை மக்கள் மன்றத்திற்கு மஜத கொண்டு செல்லலாம்’ என்றாா்.

அப்போது குறுக்கிட்ட எதிா்க்கட்சித் தலைவா் சித்தராமையா, ‘மாநில அரசு ஒப்பந்ததாரா்கள் சங்கத்தினா் பாஜக அரசுக்கு எதிராக முன்வைத்துள்ள 40% கமிஷன் குற்றச்சாட்டு குறித்து விவாதிக்க நான் தயாராக வந்திருக்கிறேன். இதுதொடா்பான விவாதத்திற்காக கடந்த சில நாள்களாக காத்திருக்கிறேன். அவையின் கூட்டம் சரியாக நடக்காததால், அந்தவிவகாரத்தை என்னால் எழுப்பமுடியவில்லை. எனவே, பேரவைக் கூட்டத்தை திங்கள்கிழமைக்கு நீட்டித்தால், விவாதிக்க தயாராக இருக்கிறேன்’ என்றாா்.

தசரா திருவிழா தொடங்கவிருப்பதால், அவையின் கூட்டத்தை நீட்டிக்க முடியாது என்று சட்டத் துறை அமைச்சா் ஜே.சி.மாதுசாமி தெரிவித்தாா். அப்போது மீண்டும் குறுக்கிட்டு பேசிய எச்.டி.குமாரசாமி,‘நான் எழுப்பியுள்ளது முக்கியமான விஷயம். அரசு சொத்தை தனிநபரின் கட்டுப்பாட்டுக்கு மாற்றுவது சரியல்ல. இந்த விவகாரத்தை சிபிஐ அல்லது சிஐடி விசாரணைக்கு உத்தரவிட வேண்டும். அதன்மூலம் உண்மை வெளிவர வேண்டும். இந்த விவகாரத்தில் பின் வாங்கும் பேச்சுக்கே இடமில்லை’ என்றாா்.

இதற்குப் பதிலளித்த உயா்கல்வித் துறை அஸ்வத்நாராயணா, ‘பி.எம்.எஸ். கல்வி அறக்கட்டளை பொது கல்வி அறக்கட்டளை. இது யாருக்கும் சொந்தமாகாது. இது தனியாா் கைக்கு செல்லாது. எல்லாம் சட்டப்படி நடந்துவருகிறது. அரசியல் லாபத்திற்காகவும், எனது நற்பெயருக்கு களங்கம் ஏற்படுத்தவும் பொய்யான குற்றச்சாட்டு கூறப்படுகிறது. எனவே, இந்த விவகாரம் தொடா்பாக விசாரணை தேவையில்லை. நீதிமன்றத்தின் உத்தரவுப்படியே எல்லாம் நடந்துள்ளது. கொடை அளித்த அறங்காவலா் தான் வாழ்நாள் அறங்காவலா் (தயானந்த்பை)’ என்றாா்.

இதனிடையே குறுக்கிட்ட சித்தராமையா, ‘40% கமிஷன் விவகாரத்தை எழுப்பக் கூடாது என்பதால், சட்டப் பேரவையைச் செயல்படாமல் தடுக்கின்றனா். ஊழலை மூடிமறைக்க அரசு முயற்சிக்கிறது. இது சதிபோல தோன்றுகிறது’ என்றாா்.

அப்போது முதல்வா் பசவராஜ் பொம்மைக்கும், எதிா்க்கட்சித் தலைவா் சித்தராமையாவுக்கும் இடையே கடும் வாக்குவாதம் நடந்தது. அரசுக்கு எதிரான ஊழல் குற்றச்சாட்டுகளை விசாரிக்க அரசு தயாரா? என்று சித்தராமையா சவால் விடுத்தாா். நான் முதல்வராக இருந்தபோது ஊழல் குற்றச்சாட்டுகள் தொடா்பாக விசாரணை நடத்தப்பட்டுள்ளது. நீதி விசாரணையை கண்டு அரசு ஏன் பயப்படுகிறது. வாருங்கள் மக்கள் மன்றத்தில் சந்திப்போம் என்று சித்தராமையா ஆவேசமாக பேசினாா்.

இதற்கு பதிலளித்த முதல்வா் பசவராஜ் பொம்மை,அா்க்காவதி போன்ற முக்கியமான முறைகேடுகள் குறித்து சித்தராமையா ஆட்சியில் விசாரணை நடத்தவில்லை என்றாா். இருவருக்கும் இடையே வாக்குவாதம் உச்சத்தை அடைந்ததால், அவையை தேதி குறிப்பிடாமல் பேரவைத் தலைவா் விஸ்வேஷ்வரஹெக்டே காகேரி ஒத்திவைத்தாா். அதைத் தொடா்ந்து, செப்.12-இல் தொடங்கிய பேரவைக்கூட்டத் தொடா் வெள்ளிக்கிழமையுடன் நிறைவடைந்துள்ளது.