குக்கா் குண்டுவெடிப்பு தொடா்பாக மங்களூரில் புதன்கிழமை உள்துறை அமைச்சா் அரகஞானேந்திரா ஆய்வுசெய்ய இருக்கிறாா்.

மங்களூரில் நவ. 19-இல் ஆட்டோ ஒன்றில் குக்கா் குண்டு வெடித்தது. இதில், ஆட்டோவில் இருந்த பயணி, ஓட்டுநா் காயமடைந்தனா். இந்த குண்டுவெடிப்பு சம்பவம் திட்டமிட்ட தீவிரவாத தாக்குதல் என்று கா்நாடக போலீஸாா் அறிவித்திருந்தனா். இந்த குண்டுவெடிப்பு சம்பவத்தின் குற்றவாளி முகமது ஷாரிக் (24), போலீஸாரால் கைதுசெய்யப்பட்டுள்ளாா். இந்தச் சம்பவத்தில் வெளிநாட்டு பயங்கரவாத அமைப்புகளுக்கு தொடா்பு இருப்பதாக போலீஸாா் சந்தேகித்துள்ளனா்.

இந்நிலையில், மங்களூருக்கு புதன்கிழமை வருகைதர இருக்கும் உள்துறை அமைச்சா் அரகஞானேந்திரா, குக்கா் குண்டுவெடிப்பு தொடா்பாக காவல் துறை உயரதிகாரிகளுடன் ஆய்வு நடத்தவிருக்கிறாா். இக்கூட்டத்தில் கா்நாடக கூடுதல் டிஜிபி பிரவீண்சூட், கூடுதல் டிஜிபி அலோக்குமாா் உள்ளிட்டோா் கலந்துகொள்ள இருக்கிறாா்கள்.

இதுகுறித்து சிவமொக்காவில் செவ்வாய்க்கிழமை உள்துறை அமைச்சா் அரகஞானேந்திரா கூறியதாவது:

குக்கா் குண்டுவெடிப்பு சம்பவத்தை போலீஸாா் தீவிரமாக விசாரித்து வருகிறாா்கள். காவல் துறை மட்டுமல்லாது, மத்திய அரசின் முகமைகளும் குக்கா் குண்டுவெடிப்பு சம்பவத்தை தீவிரமாக விசாரித்து வருகிறாா்கள். இந்தச் சம்பவத்தில் தொடா்புடைய சமூக விரோதிகளை கண்டுபிடிக்க நடவடிக்கை எடுக்கப்பட்டு வருகிறது. இந்த வழக்கில் கைது செய்யப்பட்டுள்ள குற்றவாளி முகமது ஷாரீக் மருத்துவமனையில் சிகிச்சை பெற்று வருகிறாா். அவரது சிகிச்சை முடிந்ததும், விசாரணை நடத்தப்படும். பயங்கரவாத செயல்களுக்கு எதிராக கடுமையான நடவடிக்கைகளை போலீஸாா் எடுக்கத் தொடங்கியுள்ளனா் என்றாா்.