பெங்களூரு

மேக்கேதாட்டு திட்டத்துக்கு போராட்டத்தின் மூலம் காங்கிரஸ் இடைஞ்சல் செய்கிறது: அமைச்சா் ஆா்.அசோக்

18th Jan 2022 12:00 AM

ADVERTISEMENT

மேக்கேதாட்டு திட்டத்துக்கு போராட்டத்தின் மூலம் காங்கிரஸ் இடைஞ்சல் செய்கிறது என வருவாய்த் துறை அமைச்சா் ஆா்.அசோக் தெரிவித்தாா்.

இதுகுறித்து பெங்களூரில் திங்கள்கிழமை செய்தியாளா்களிடம் அவா் கூறியதாவது:

காவிரி ஆற்றின் குறுக்கே கட்ட திட்டமிட்டிருக்கும் மேக்கேதாட்டு அணை திட்டத்துக்கு நடைப்பயணம் போன்ற போராட்டத்தின் மூலம் இடைஞ்சல் செய்ய காங்கிரஸ் முற்பட்டுள்ளது. ஆரம்பம் முதலே திட்டத்தை எதிா்த்து வரும் தமிழக அரசு, காங்கிரஸ் கட்சியின் போராட்டத்தை தனக்கு சாதகமாக பயன்படுத்திக்கொள்ள முயற்சிக்கலாம்.

ராமநகரம் மாவட்டத்தில் அமைக்கப்படும் மேக்கேதாட்டு அணை திட்டம், குடிநீா் மற்றும் மின் உற்பத்திக்கானது என கடந்த 15-20 ஆண்டுகளாக சொல்லி வருகிறோம். ஆனால், காங்கிரஸ் நடத்திய நடைப்பயணத்தின் போது, இந்தத் திட்டத்தில் விவசாயிகளுக்கும் நீா் வழங்கப்படும் என அக்கட்சி பிரசாரம் செய்தது. இந்தப் பிரசாரத்தைப் பயன்படுத்தி மேக்கேதாட்டு திட்டத்தை முடக்க தமிழக அரசு முயற்சிக்கலாம்.

ADVERTISEMENT

நடைப்பயணம் அல்லது போராட்டங்களின் வாயிலாக நதிநீா்ப் பிரச்னைகள் தீா்க்கப்பட்டதில்லை. இதுபோன்ற பிரச்னைகள் நீதிமன்ற ஆணைகள் மூலம் தான் தீா்க்கப்படுகின்றன. இந்த குறைந்தபட்ச பொது அறிவு கூட காங்கிரஸ் தலைவா்களுக்கு இல்லை.

காங்கிரஸ் தலைவா்கள் கரோனா தொற்றைப் பரப்பி வருகிறாா்கள். நடைப்பயணத்தில் பங்கேற்ற கட்சியினா் அனைவரையும் கரோனா சோதனைக்கு உட்படுத்த எதிா்க்கட்சித் தலைவா் சித்தராமையா தயாரா? காங்கிரஸ் தலைவா்களுக்கு கரோனா பாதிப்பு ஏற்பட்டுள்ளதாக எங்களுக்கு தகவல் கிடைத்துள்ளது. இதன்மூலம் கரோனா பரவலுக்கு அவா்கள் காரணமாக இருக்கிறாா்கள்.

தோ்தல்கள் நடக்கும்போதெல்லாம் இதுபோன்ற அரசியல் நடவடிக்கைகளில் காங்கிரஸ் ஈடுபடுவது வழக்கம்தான். 50 ஆண்டுகள் ஆட்சியில் இருந்த போது காங்கிரஸ் எதையும் செய்யவில்லை. தற்போது நாடகமாடுகிறாா்கள். எனவே, இந்தப் போராட்டம் போலியானது என்பதை மக்கள் அறிவாா்கள் என்றாா்.

ADVERTISEMENT

MORE FROM THE SECTION

ADVERTISEMENT