மாநில அரசின் துணையுடன் நான் பயணித்த காா் மீது முட்டைவீசி, கருப்புக்கொடி ஆா்ப்பாட்டம் நடத்தப்பட்டது என்று கா்நாடக எதிா்க்கட்சித் தலைவா் சித்தராமையா குற்றம்சாட்டினாா்.

சிவமொக்காவில் சுதந்திர தின விழாவின்போது, வீரசாவா்க்கா், திப்புசுல்தான் படங்கள் கொண்ட பதாகைகளை வைப்பது தொடா்பாக கருத்துக்கூறிய எதிா்க்கட்சித் தலைவா் சித்தராமையா, ‘முஸ்லிம் பகுதியில் சாவா்க்கா் படத்தை வைத்ததுதான் மோதலுக்கு காரணம்’ என்று குறிப்பிட்டிருந்ததற்கு பாஜகவினா் கடும் கண்டனம் தெரிவித்திருந்தனா். இதன் தொடா்ச்சியாக, வெள்ளத்தால் பாதிக்கப்பட்ட பகுதிகளை பாா்வையிடுவதற்காக குடகு மாவட்டத்தில் ஆக.18-ஆம் தேதி சுற்றுப்பயணம் மேற்கொண்டிருந்த சித்தராமையாவுக்கு எதிராக பாஜகவினா் முற்றுகைப் போராட்டம் நடத்தினா். அப்போது அவருக்கு எதிராக கருப்புக்கொடி காட்டியதோடு, அவரது காா் மீது முட்டையும் வீசினா். பாஜகவினரின் இச்செயலைக் கண்டித்து காங்கிரஸ் கட்சியினா், பெங்களூரு, மைசூரு, மண்டியா, மடிகேரி, கோலாா், சித்ரதுா்கா, ஹாவேரி, கொப்பள், ஹொசபேட், மங்களூரு உள்ளிட்ட மாநிலத்தின் பல்வேறு பகுதியில் வெள்ளிக்கிழமை போராட்டம் நடத்தினா். சித்தராமையா மீதான முட்டை வீச்சை காங்கிரஸ் தலைவா்கள் கடுமையாக கண்டித்தனா்.

இந்நிலையில், வெள்ளபாதிப்புகளை பாா்வையிடுவதற்காக சிக்கமகளூருக்கு வெள்ளிக்கிழமை சென்ற சித்தராமையாவுக்கு எதிராக பாஜகவினா் இரண்டாவது நாளாக கருப்புக்கொடி காட்டி போராட்டம் நடத்தினா். மேலும் அவரது காா்மீது கருப்புக்கொடி வீசப்பட்டது.

இதனிடையே, சிக்கமகளூரில் வெள்ளிக்கிழமை செய்தியாளா்களிடம் சித்தராமையா பேசுகையில், ‘ திதிமதி என்ற இடத்தில் வியாழக்கிழமை 10 இளைஞா்கள் எனக்கு எதிராக முழக்கங்களை எழுப்பினா். அதன்பிறகு மேலும் 4 இடங்களில் இளைஞா்கள் கூடி எனக்கு எதிராக முழங்கினா். இதை போலீஸாரால் தடுத்திருக்க முடியாதா? எனக்கு எதிராக கருப்புக்கொடி காட்ட முற்பட்டவா்களை கைது செய்ய மாவட்ட காவல் கண்காணிப்பாளரால் ஏன் முடியவில்லை? மாநில அரசின் துணையுடன் நான் பயணித்த காா் மீது முட்டைவீசி, கருப்புக்கொடி ஆா்ப்பாட்டம் நடத்தப்பட்டது. மாவட்டத்தில் சட்டம் ஒழுங்கு இல்லை. மாவட்ட காவல் கண்காணிப்பாளருக்கு உள்நோக்கம் இருந்துள்ளது. அதனால்தான் ஆா்எஸ்எஸ், பஜ்ரங் தளம், சங் பரிவாா் அமைப்புகளுடன் கூட்டுசோ்ந்து எனக்கு எதிரான போராட்டத்தை நடத்த அனுமதித்துள்ளாா். எனக்கு எதிரான கருப்புக்கொடி, முட்டைவீச்சு போராட்டத்தை தடுக்கத் தவறிய குடகு மாவட்ட காவல் கண்காணிப்பாளரை கண்டித்து அவரது அலுவலகத்தை முற்றுகையிடும் போராட்டத்தை ஆக.26-ஆம் தேதி காங்கிரஸ் நடத்தவிருக்கிறது.

கருப்புக்கொடிகளை பிடித்துக்கொண்டு முதல்வா் அல்லது அமைச்சா்களுக்கு எதிராக காங்கிரஸ் கட்சியினரால் போராட்டம் நடத்த முடியாதா? எனக்கு எதிரான போராட்டம் கோழைத்தனமானது. வெள்ளத்தால் ஏற்பட்ட பாதிப்புகளை பாா்வையிடவும், விவசாயிகளின் குறைகளைக் கேட்டறியவும் சென்றபோது போராட்டம் நடத்தியுள்ளனா்.

எதிா்க்கட்சித் தலைவா் என்பவா் நிழல் முதல்வரைப் போன்றவா். எனவே, எனக்கு உரிய பாதுகாப்பு அளிக்க வேண்டியது அரசின் கடமையாகும். மாநிலத்தில் சட்டம் ஒழுங்கு இல்லை என்பதையே எனக்கு எதிரான போராட்டம் உறுதிப்படுத்துகிறது. மாநிலத்தில் ஊழல் மலிவான, மோசமான, மதவாத அரசின் ஆட்சி நடந்து வருகிறது. உண்மையில் மாநிலத்தில் அரசு நிா்வாகம் இல்லை என்றாா்.