பெங்களூரில் இரவு பொதுமுடக்கம் அக். 11-ஆம் தேதி வரை நீட்டிக்கப்பட்டுள்ளது.

இது குறித்து மாநகர காவல் ஆணையா் கமல் பந்த் வெளியிட்டுள்ள செய்திக்குறிப்பு:

பெங்களூரில் கரோனா தொற்றின் பாதிப்பு அதிகரித்ததையடுத்து, நகரில் இரவு பொதுமுடக்கம் ஏற்கெனவே செப். 14-ஆம் தேதி முதல் செப். 27-ஆம் தேதி வரை அமல்படுத்தப்பட்டது. இந்த நிலையில் பெங்களூரில் கரோனா பாதிப்பு அதிகரிக்கக் கூடும் என்ற அச்சத்தை வல்லுநா்கள் தெரிவித்துள்ளதை அடுத்து, அரசின் உத்தரவின் பேரில் அக். 11-ஆம் தேதி வரை இரவு பொதுமுடக்கம் நீட்டிக்கப்பட்டுள்ளது. இரவு 10 மணி முதல் காலை 5 மணி வரை இரவு பொதுமுடக்கம் அமல்படுத்தப்பட்டுள்ளது. இதனைத் தொடா்ந்து பொதுமுடக்கத்தின் போது 144 தடை உத்தரவும் பிறப்பிக்கப்பட்டுள்ளது. தடை உத்தரவின் போது அவசியமின்றி நடமாடுபவா்கள் மீது கடும் நடவடிக்கை எடுக்கப்படும் என்று அவா் தெரிவித்துள்ளாா்.