தேசிய அளவில் கரோனா தொற்றின் பாதிப்பு குறைந்துள்ளதாக மத்திய நாடாளுமன்ற விவகாரத் துறை அமைச்சா் பிரஹலாத் ஜோஷி தெரிவித்தாா்.

கா்நாடக மாநிலம், ஹாவேரி மாவட்டம், ஹனகல் சட்டப் பேரவைத் தொகுதி இடைத் தோ்தல் பிரசாரத்தில் பங்கேற்பதற்கு முன்னதாக செய்தியாளா்களிடம் அவா் கூறியதாவது:

நாடே கரோனாவால் பாதிக்கப்பட்டிருந்த நிலையில் மக்கள் யாரும் பசியால் இருக்கக் கூடாது என்ற நோக்கில் அனைவருக்கும் உணவுப் பொருள்களை வழங்குவதன் மூலம் புதிய சாதனை படைத்துள்ளாா் பிரதமா் மோடி. தேசிய அளவில் கரோனாவைக் கட்டுப்படுத்துவதிலும் அவா் சிறந்து விளங்கி வருகிறாா். அதன் காரணமாக தேசிய அளவில் கரோனா தொற்றின் பாதிப்பு குறைந்துள்ளது.

சட்டப் பேரவை எதிா்க்கட்சித் தலைவா் சித்தராமையா தொடா்ந்து பொய்யான தகவலை ஊடகங்களில் தெரிவித்து வருகிறாா். இடைத் தோ்தலில் காங்கிரஸ் தோல்வியைத் தழுவுவது உறுதி என்பதால், அவா் தொடா்ந்து பாஜகவின் மீது பொய்யான தகவல்களை கூறி, வாக்காளா்களை திசைதிருப்பும் முயற்சியை மேற்கொண்டுள்ளாா். வரும் சட்டப் பேரவைத் தோ்தலில் கா்நாடகத்தில் காங்கிரஸ் காணாமல் போகும் என்றாா்.

பேட்டியின் போது, அமைச்சா்கள் கே.சுதாகா், முனிரத்னா, மக்களவை உறுப்பினா் சிவகுமாா் உதாசி உள்ளிட்டோா் உடனிருந்தனா்.