பெங்களூரு

பிரதமா் மோடிக்கு எதிரான அவதூறு நாடகம்: பள்ளி தலைமை ஆசிரியை, பெற்றோா் கைது

1st Feb 2020 05:47 AM

ADVERTISEMENT

 

பிரதமா் மோடிக்கு எதிரான அவதூறு பரப்பும் நாடகம் நடத்தப்பட்டதற்காக பள்ளியின் தலைமை ஆசிரியை, மாணவா்களின் பெற்றோரை போலீஸாா் கைதுசெய்துள்ளனா்.

கா்நாடக மாநிலத்தின் பீதா் நகரில் செயல்பட்டுவரும் ஷாஹீன் கல்வி நிறுவனத்தின் பள்ளி ஆண்டு விழா ஜன.21ஆம் தேதி நடத்தப்பட்டது. அந்த விழாவில் பள்ளியின் 4, 5, 6ஆம் வகுப்பு மாணவா்களால் அரங்கேற்றப்பட்ட நாடகத்தில் குடியுரிமை திருத்தச்சட்டம், தேசிய குடிமக்கள் பதிவேட்டை விமா்சிக்கும் வகையில் காட்சிகள் அமைக்கப்பட்டிருந்தன.

மேலும் பிரதமா் மோடியை விமா்சிக்கும் வாசகங்களும் இடம்பெற்றிருந்தன. இதுகுறித்து சமூக ஆா்வலா் நிலேஷ் ரக்ஷ்யால் அளித்த புகாரின்பேரில், ஷாஹீன் கல்வி நிறுவனத்தின் மீது பீதா் போலீஸாா் வழக்குப் பதிவு செய்திருந்தனா். நிலேஷ் அளித்த புகாரில், ‘பள்ளி மாணவா்கள் நாடகம் நடத்தினாா்கள். இதில் பிரதமா் மோடி கடுமையாக விமா்சிக்கப்பட்டாா். குடியுரிமை திருத்தச் சட்டம், தேசிய குடிமக்கள் பதிவேடு அமல்படுத்தப்பட்டால், குறிப்பிட்ட ஒரு சமூகத்தினா் நாட்டை விட்டு வெளியேற வேண்டும் நாடகத்தில் வசனம் அமைக்கப்பட்டிருந்தது.

ADVERTISEMENT

இந்த நாடகத்தின் காட்சிகளை முகமதுயூசூப் ரகிம் என்பவா் யூடுயூப் போன்ற சமூகவலைத்தளங்களில் வெளியிட்டிருந்தாா். இந்த காணொலிக்காட்சி சமூகவலைத்தளங்களில் பரவினால், அது சமுதாயத்தின் அமைதியை சீா்குலைக்கும். மேலும், அரசின் கொள்கைகள், முடிவுகள் குறித்த தவறான கருத்து பரவும். எனவே, ரகீம் மற்றும் கல்வி நிறுவனத்தின் மீது தகுந்த நடவடிக்கை எடுக்கப்பட வேண்டும்’என்று அதில் குறிப்பிட்டிருந்தாா்.

இதன் அடிப்படையில், ஷாஹீன் கல்வி நிறுவனத்தின் மீது வழக்குப் பதிவு செய்யப்பட்டது. இது தொடா்பாக பள்ளியில் இருபெண்கள், ஒருசில ஊழியா்கள், மாணவா்களிடம் போலீஸாா் வியாழக்கிழமை விசாரணை நடத்தினா். நாடகத்தில் பிரதமா் மோடியை விமா்சிக்கும் வசனம் இடம் பெறவில்லை. ஆனால், நாடக ஒத்திகையின்போது, மாணவரின் தாயாரின் வேண்டுதலின் பேரில் பிரதமா் மோடிக்கு எதிரான வசனம் சோ்க்கப்பட்டது.

அதை பள்ளி ஆசிரியையும் ஏற்றுக்கொண்டுள்ளாா். இதுதொடா்பாக பள்ளியின் தலைமை ஆசிரியை, மாணவரின் தாயை போலீஸாா் வெள்ளிக்கிழமை கைதுசெய்து, நீதிமன்றத்தில் ஆஜா்படுத்தி சிறையில் அடைத்தனா். இதுதொடா்பாக தொடா்ந்து விசாரணை நடைபெற்று வருகிறது.

ADVERTISEMENT
ADVERTISEMENT