அண்மைகாலமாகச் சமூகவலைத்தளங்களில் மீ டூ எனும் தலைப்பில் பெண்கள் தங்களுக்கு நேர்ந்த பாலியல் துன்புறுத்தல்களையும், கொடுமைகளையும் பகிர்ந்து வருவது பரவலாகக் கவனத்தைப் பெற்று வருகிறது. குறிப்பாக, சில முக்கிய பிரமுகர்களுக்கு எதிராக முன்வைக்கப்படும் குற்றச்சாட்டுகளும் பெரும் பரபரப்பை ஏற்படுத்தி வருகின்றன.
இந்நிலையில் நடிகை லேகா வாஷிங்டன், மீ டூ குறித்து ஒரு ட்வீட் வெளியிட்டுள்ளார். ஒரு வார்த்தை: கெட்டவன் #மீடூ என்று ட்வீட் வெளியிட்டு பரபரப்பை ஏற்படுத்தியுள்ளார். ஜெயம் கொண்டான், கல்யாண சமையல் சாதம் போன்ற படங்களில் லேகா வாஷிங்டன் நடித்துள்ளார்.
பத்து வருடங்களுக்கு முன்பு கெட்டவன் என்கிற படத்தில் சிம்புவும் லேகா வாஷிங்டனும் நடித்தார்கள். சில நாள்கள் படமாக்கப்பட்ட அந்தப் படம் பிறகு கைவிடப்பட்டு இன்றுவரை மீண்டும் தொடராமல் உள்ளது.
ட்வீட்டில், யார் பெயரையும் குறிப்பிடாததால் லேகா யாரைச் சொல்கிறார், படத்தின் கதாநாயகனையா அல்லது படக்குழுவினரயா என்கிற கேள்வி எழுந்துள்ளது. இதையடுத்து லேகாவின் இந்த ட்வீட்டுக்கு சிம்பு ரசிகர்கள் பலர் கண்டனம் தெரிவித்துள்ளார்ள்.