2.0 படத்துக்குப் பிறகு கமல் நடிப்பில் இந்தியன் 2 படத்தை ஷங்கர் இயக்கவுள்ளார். கமலுக்கு ஜோடியாக காஜல் அகர்வால் நடிக்கிறார். துல்கர் சல்மான், சிம்பு ஆகியோரும் இந்தியன் 2 படத்தில் நடிக்கவுள்ளதாகத் தகவல்கள் வெளியாகியுள்ளன.
இந்நிலையில் இந்தியன் 2 படத்தில் அனிருத் இசையமைக்கவுள்ளதாகச் செய்திகள் வெளியான நிலையில் அதை ஒரு பேட்டியில் அவர் உறுதி செய்துள்ளார். அனிருத் இசையமைத்த ஒரு படத்தின் இசை வெளியீட்டு விழாவில் தனக்கு அனிருத் பாடல்கள் மிகவும் பிடிக்கும் என ஷங்கர் கூறியிருந்தார். இதையடுத்து ஷங்கர் - அனிருத் கூட்டணி இந்தியன் 2 படம் மூலமாக முதல்முறையாக இணைந்துள்ளது. ரஜினி நடித்து பொங்கலன்று வெளிவரவுள்ள பேட்ட படத்துக்கும் அனிருத் இசையமைத்துள்ளார்.
இந்தியன் 2 படத்துக்கு இசையமைப்பது குறித்து தனியார் வானொலிக்கு அளித்த பேட்டியொன்றில் அனிருத் கூறியதாவது:
அவரைப் போன்ற ஒரு ஜீனியஸ் நம்மிடம் எப்படிப் பாடல் வாங்குகிறார் என்று நாம் உணராத அளவுக்கு இசையை வழங்கிக்கொண்டே இருப்போம். அந்தளவுக்கு அவருடைய கற்பனைகள் இருக்கும். இருவரும் நன்கு ஒருவருக்கொருவர் புரிந்துகொண்டுவிட்டோம். இயக்குநர் - இசையமைப்பாளர் என்பதைவிட நண்பர்கள் என்று சொல்லலாம். நான் இளையவனாக இருந்தாலும் என்னை ஒரு நல்ல நண்பன் போல நடத்துகிறார் என்று கூறியுள்ளார்.
இந்தப் படம் குறித்து கமல் சமீபத்தில் கூறியதாவது: 2019 நாடாளுமன்றத் தேர்தலில் மக்கள் நீதி மய்யம் தமிழ்நாட்டில் போட்டியிடுகிறது. இதனால், தற்போது நடிக்கவுள்ள இந்தியன் 2 படத்துக்குப் பிறகு நடிப்பிலிருந்து விலகிவிடுவேன். இந்தியன் 2 படப்பிடிப்பு டிசம்பர் 14 முதல் தொடங்குகிறது என்றார். இதனால் இந்தியன் 2 படம் கமல் நடிக்கும் கடைசிப் படம் என்று கூறப்படுகிறது.